Zülfiya Yakup
28 Maj 2018•Përditësim: 29 Maj 2018
PRISHTINË (AA) – Ndërtimi i një tuneli midis Pejës dhe Rozhajës dhe heqja e pagesës së sigurimit kufitar mes Kosovës dhe Malit të Zi janë çështjet kryesore të diskutuara në takimin e mbajtur në Prishtinë midis delegacioneve të të dy vendeve të udhëhequra nga ministri i Infrastrukturës i Kosovës, Pal Lekaj dhe ministri i Transportit dhe Çështjeve Detare i Malit të Zi, Osman Nurkoviç, raporton Anadolu Agency (AA).
Ministri Lekaj, në konferencën e përbashkët për media me homologun e tij Nurkoviç, tha se bashkëpunimi mes Kosovës dhe Malit të Zi është një shembull i mirë për mbarë rajonin, ku i jepet një rëndësi e madhe avancimit të infrastrukturës rrugore, hekurudhore dhe ajrore.
Ministri kosovar bëri të ditur se i është dhënë garanci se rruga Deçan-Plavë do të realizohet edhe në anën e Malit të Zi, ndërsa punimet në anën e Kosovës tashmë janë duke u zhvilluar sipas dinamikës së planifikuar.
I pyetur për të skicuar vështirësitë për të bërë këtë rrugë në segmentin që po kalon nga Manastiri i Deçanit të Lartë, për shkak të kundërshtimit të Kishës Ortodokse Serbe, Lekaj tha se politika e Beogradit ishte e përfshirë dhe se nuk ka vend për të. Ai vuri në dukje se Kosova është e vetëdijshme për angazhimin që ka ndërmarrë sipas planit të Ahtisarit dhe se punët kryhen jashtë zonës së mbrojtur rreth manastirit.
“Është e vërtetë se ka pasur ndërhyrje nga një kompani që kryen punime sipas kontratës, sepse erozioni i tokës është vazhdimisht në proces atje dhe ne duhet të bëjmë rrugën e kalueshme. Prandaj, askush nuk duhet të jetë i shqetësuar për këtë. Rrugët atje janë për t'u bashkuar dhe janë në interes të qytetarëve, zhvillimit ekonomik dhe zhvillimit të turizmit, por nuk do të lejojmë që një institucion të rrezikojë ose t'i japë përparësi një institucioni tjetër”, tha Lekaj.
Ndërkaq, ministri Nurkoviç vlerësoi se vizita e sotme në Kosovë është vazhdim i bashkëpunimit midis dy vendeve dhe konfirmim se është nisur në drejtim të mirë. Ai theksoi se projekti më i rëndësishëm mbi të cilën është biseduar është ndërtimi i tunelit Pejë-Rozhajë.
“Mbi këtë projekt filluam të flasim para një viti e gjysmë dhe atë e kemi ngritur në nivel të qeverive dhe kemi mbështetje të kryeministrave të të dyja shteteve, si dhe shpresoj që do të jetë në majë të agjendës edhe të ndonjë Qeverie të ardhshme kur është fjala për infrastrukturën rrugore. Projekti tjetër mbi të cilin biseduam është ndërtimi i aksit rrugor Plavë–Deçan, gjegjësisht lidhjen e Malit të Zi dhe Kosovës edhe me një aks rrugor”, tha Nurkoviç.
Nurkoviç poashtu theksoi se është diskutuar edhe rreth eliminimit më të shpejtë të sigurisë kufitare ndërmjet Malit të Zi dhe Kosovës, pasi ky sigurim u shqua si një pengesë biznesi. Ai tha se heqja e sigurimit kufitar do të ndikojë në rritjen e tranzitit dhe aktivitetit ekonomik, si dhe në lëvizjen e qytetarëve të të dy vendeve.
Ministri i Malit të Zi theksoi se është diskutuar edhe marrëveshja për bashkëpunimin në fushën e transportit, për të cilën bëri të ditur se duhet të përgatitet në qershor dhe të nënshkruhet në korrik dhe për të cilën tha se vetëm do të përmirësojë marrëdhëniet e shkëlqyera politike të të dy vendeve.
