Fatjon Cuka
02 Maj 2017•Përditësim: 03 Maj 2017
TIRANË (AA) - Në Tiranë është mbajtur sot forumi me temë "Doganat dhe ndërkombëtarizimi, përmirësimi i energjisë”, rreth procedurave në fuqi doganore, risive legjislative, zgjidhjeve teknike dhe për zhvillimet e pritshme në legjislacionin doganor, raporton Anadolu Agency (AA).
Në forumin organizuar nga Confindustria Albania në bashkëpunim me Drejtorinë e Përgjithshme të Doganave të Republikës së Shqipërisë, merrnin pjesë zyrtarë të lartë të Administratës Doganore, përfaqësues të shoqatave të biznesit, etj.
Mirela Meko, Zv.drejtoresha e Përgjithshme e Doganave të Shqipërisë, u shpreh gjatë fjalës së saj se gjatë muajt maj kanë vendosur të organizojë konsultime të vazhdueshme dhe fushata informimi me biznesin për risitë e kodit doganor.
"Aktualisht Drejtoria e Doganave po punon dhe pothuajse është në përfundim të hartimit të dispozitave zbatuese për kodin e ri doganor, që hyn në fuqi në qershor të vitit 2017. Nëpërmjet këtyre diapozitiva ne kemi synuar jo vetëm përafrimin e legjislacionit shqiptar me atë të BE-së, por edhe futjen e procedurave të reja të parashikuara prej tij, të cilat nënkuptojnë nevojën për një bashkëpunim më të madh biznes-dogana", theksoi Meko.
Sipas saj, kodi i ri doganor nxit përdorimin e teknologjisë së informacionit dhe komunikimit, me synim rritjen e efektivitetet të kontrollove doganore.
Aktiviteti është organizuar në formën e një forumi teknik, në vijim të procesit të konsultimit lidhur me çështjet doganore që përfshijnë edhe investitorët e huaj.
Sipas organizatorëve të këtij aktiviteti, përshpejtimi i procedurave doganore, thjeshtëzimi i marrjes së autorizimeve doganore, ulja e kontrollove fizike dhe dokumenteve nga ana e doganave, janë disa nga avantazhet për kompanitë që marrin certifikimin AEO (Operatori Ekonomik i Autorizuar), një instrument i cili do të përshpejtojë praktikat doganore dhe do të thjeshtëzojë kontrollet në trafiqet tregtare ndërkombëtare.
