Kryeministri në detyrë i Kosovës, Albin Kurti, një ditë pasi u bë e qartë se 15 prilli është data për mbajtjen e seancës konstituive të Kuvendit të Kosovës, ka nisur takimet për konsultim me krerët e partive të minoriteteve në Kosovë për formimin e qeverisë së re, transmeton Anadolu.

Kurti gjatë ditës ka pritur në Zyrën e tij në Qeverinë e Kosovës zëvendëskryeministren për Çështje të Pakicave dhe të Drejtat e Njeriut dhe kryetaren e Partia e Re Demokratike (NDS), Emilija Rexhepi, si dhe ministrin për Komunitete dhe Kthim dhe kryetarin e Partisë për Liri, Drejtësi dhe Mbijetesë, Nenad Rashiq.

Sipas njoftimit nga Zyra e Kryeministrit, zëvendësministrja në detyrë Rexhepi por edhe ministri në detyrë Rashiq kanë konfirmuar mbështetjen për një mandat të ri qeveritar të udhëhequr nga Lëvizja Vetëvendosje.

Të dyja këto parti, njëra e cila përfaqëson komunitetin boshnjak në Kosovë dhe tjetra komunitetin serb, kanë nga një deputet në Kuvendin e Kosovës.

Seanca konstituive për Kuvendin e Kosovës është caktuar nga presidentja Vjosa Osmani, më 15 prill, derisa mbetet të shihet nëse në të njëjtën seancë do të mund të formohet edhe qeveria e re.

Lëvizja Vetëvendosje nga zgjedhjet e përgjithshme të 9 shkurtit 2025 mori 48 deputetë, ndërsa për formimin e qeverisë së re duhen shumica e thjeshtë e 120 deputetëve, apo 61 vota. Nga kjo parti janë shprehur të bindur se tashmë Lëvizja Vetëvendosje i ka bërë numrat që i duhen për formimin e qeverisë së re.