Partia Demokratike Turke e Kosovës (KDTP) do ta mbështesë kryeministrin në detyrë Albin Kurtin në formimin e qeverisë së re, transmeton Anadolu.

Në një njoftim për media nga Zyra e Kryeministrit, u bë e ditur se kryeministri në detyrë, Albin Kurti, i shoqëruar nga zëvendëskryeministri i parë, Besnik Bislimi, pritën në takim ministrin e Zhvillimit Rajonal, Fikrim Damka, njëherësh kryetar i Partisë Demokratike Turke të Kosovës (KDTP), bashkë me kryetarin e Komunës së Mamushës, Abdülhadi Krasniç, që gjithashtu mban pozitën e nënkryetarit të KDTP-së.

Sipas njoftimit, palët diskutuan për hapat përpara për formimin e institucioneve të legjislaturës së 9-të të dalë nga zgjedhjet e rregullta parlamentare të 9 shkurtit.

"Të dyja palët shprehën vullnetin dhe gatishmërinë që ky bashkëpunim i frytshëm të vazhdojë edhe në legjislaturën në vijim", thuhet në njoftim.

Ky takim u mbajt në kuadër të konsultimeve me partitë politike të komuniteteve joshumicë për formimin e qeverisë së re pas certifikimit të rezultateve nga Komisioni Qendror i Zgjedhjeve.

Kurti gjithashtu takoi edhe deputeten e Kuvendit të Kosovës nga komuniteti boshnjak Duda Balje, e cila pas takimit deklaroi për media se nuk ia ka dhënë konfirmimin kryeministrit në detyrë Albin Kurti nëse do ta mbështesë atë për një mandat të tretë. Sipas saj, kryeministri nuk konfirmoi nëse do t'i plotësojë kërkesat e boshnjakëve.

Gjatë ditës kryeministri në detyrë, Kurti, pritet të zhvillojë takime edhe me drejtues dhe përfaqësues tjerë të partive të komuniteteve joshumicë që kanë fituar mandat të përfaqësimit në Kuvend.