Në Shqipëri ka filluar Shkolla Rinore Ballkanike 2025, që organizohet nga Shoqata e të Diplomuarve në Türkiye e Shqipërisë (TUMED), në bashkëpunim me Kryesinë e Turqve Jashtë Vendit dhe Komuniteteve Mike (YTB), raporton Anadolu.

Në aktivitetin e hapjes në ambientet e TUMED-it në Tiranë, ambasadori turk në Tiranë, Tayyar Kağan Atay, mbajti leksionin e parë të fokusuar në çështjet dhe zhvillimet në fushën ekonomike mes Türkiyes dhe Shqipërisë, duke bashkëbiseduar edhe me pjesëmarrësit.

Në një deklaratë për Anadolu, ambasadori Atay u shpreh se programi i shkollës do të zgjasë afërsisht tetë javë.

"Jemi së bashku me vëllezërit tanë shumë të vlefshëm shqiptarë, me studentët dhe pedagogët tanë, me vëllezërit dhe motrat tona që kanë studiuar në Türkiye ose kanë studiuar këtu (në Shqipëri), tha Atay.

Duke theksuar se do të jenë në fokus edhe marrëdhëniet mes dy vendeve, ai tha se gjatë programit të shkollës do të ketë folës nga autoritetet shqiptare dhe përfaqësues nga organizatat e ndryshme.

Ambasadori turk u shpreh se pas përfundimit të programit të shkollës, pjesëmarrësit do të vizitojnë edhe disa qytete në Türkiye.

Kryetari i TUMED-it, Egert Haxhiu, falënderoi ambasadorin Atay, sipas tij për mbështetjen e ofruar në kuadër të Shkollës Rinore Ballkanike.

"Ne e bëmë traditë çdo vit këtë program dhe do të mbajmë leksione tetëjavore për studentët në Shqipëri. Ne përpiqemi t'u ofrojmë informacione të reja të rinjve, duke përcjellë mendimet e historianëve të ndryshëm, gazetarëve vendas dhe studiuesve të ndryshëm", tha Haxhiu.

Shkolla Rinore Ballkanike 2025 do të zgjasë tetë javë dhe në seminaret e saj do të marrin pjesë 20 të rinj që kanë studiuar apo studiojnë në degë të ndryshme, ndërkohë do të trajtohen çështje nga fusha e kulturës, arsimit, historisë, ekonomisë, politikës dhe të tjera.