Votohet legjislatura e re e Kuvendit të Kosovës, deputetët morën zyrtarisht mandatin pas betimit
Kryesuesi Dehari lexoi tekstin e betimit të deputetëve derisa deputetët e dëgjuan dhe më pas u betuan duke qëndruar në këmbë
Foto: AA/Arkiv
Prishtinë
Është votuar legjislatura e nëntë me radhë në historinë e Kuvendit të Republikës së Kosovës, raporton Anadolu.
Me 119 vota pro, më të votuarit e koalicioneve, partive politike dhe nismave qytetare morën zyrtarisht postet e ligjvënësve të rinj të Kuvendit të Kosovës.
Pas dy seancave ku dështoi të votohej miratimi i raportit të Komisionit për verifikim të kuorumit dhe mandateve, përfaqësuesit e partive politike u pajtuan që të votojnë për kalimin e tij dhe më pas edhe pikës së dytë, betimin e deputetëve.
Kryesuesi Avni Dehari lexoi tekstin e betimit të deputetëve derisa deputetët e dëgjuan dhe më pas u betuan duke qëndruar në këmbë.
Pas betimit të deputetëve, pika e radhës ishte ajo e votimit për kryetarin e ri të Kuvendit të Kosovës dhe partia e parë, Lëvizja Vetëvendosje e propozoi deputeten Albulena Haxhiu për kryeparlamentare.
Por nga 115 deputetë të pranishëm në sallë për votimin e kryeparlamentarit, vetëm 57 deputetë votuan pro Haxhiut si kryeparlamentare, 20 vota ishin kundër dhe 3 abstenime.
Pas kësaj, Kuvendi shkoi në një pauzë 15 minutëshe.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.
