“Vendet arabe nuk do të lejojnë mbylljen e UNRWA-së”

KAJRO (AA) - Sekretari i përgjithshëm i Ligës Arabe, Ahmed Ebu Gayt, tha se vendet anëtare të ligës nuk do të lejojnë mbylljen e Agjencisë së Kombeve të Bashkuara për Refugjatët Palestinezë (UNRWA), transmeton Anadolu Agency (AA).

Në një deklaratë nga Liga Arabe, sekretari i përgjithshëm, Ebu Gayt, ka zhvilluar një takim me Pierre Krahenbühl, komisionerin e përgjithshëm të UNRWA-së në qendrën e përgjithshme të Ligës Arabe në kryeqytetin egjiptian, Kajro.

Ebu Gayt ka theksuar se politikat e SHBA-ve për UNRWA-në kanë qëllimin të dëmtojnë legjitimitetin e institucionit, të dobësojnë autoritetin që OKB-ja i ka dhënë UNRWA-së dhe përgatitje për eliminimin e çështjes së refugjatëve palestinezë.

"Vendet arabe janë të vetëdijshme për këtë situatë dhe nuk do të lejojnë shpërbërjen e UNRWA-së apo zëvendësimin e saj me formësime alternative ashtu sikurse dëshirojnë SHBA-ja dhe Izraeli", është shprehur Ebu Gayt.

Po ashtu Ebu Gayt ka bërë propozime në lidhje me rikuperimin e ndihmave që SHBA-ja ka vendosur të ndërpresë dhe mbylljen e deficitit financiar në të cilën ndodhet UNRWA.

Ndërsa Pierre Krahenbühl ka ndarë informacione në lidhje me pikën e fundit të krizës së përjetuar nga UNRWA-ja, dhe gjithashtu pritet që Krahenbühl të marrë pjesë në takimin e ministrave të jashtëm të vendeve të Ligës Arabe, i cili do të zhvillohet ditën e nesërme.

- Vendimi i SHBA-ve për ndalimin e ndihmave

Zëdhënësja e Departamentit Amerikan të Shtetit, Heather Nauert, në një deklaratë më 31 gusht njoftoi se SHBA-të kanë marrë vendim për ndërprerjen e plotë të ndihmave financiare për Agjencinë e Kombeve të Bashkuara për Refugjatët Palestinezë (UNRWA).

Qeveria e SHBA-ve në fillim të vitit 2018 kishte pezulluar një pjesë të madhe të mbështetjes që siguronte për UNRWA-në, ku sipas lajmeve në median amerikane Washingtoni kryente një ndihmë prej 365 milionë dollarë ndaj UNRWA-së.

UNRWA u krijua nga Asambleja e Përgjithshme e OKB-së në vitin 1949 për të ndihmuar refugjatët palestinezë në Jordani, Siri, Liban, Bregun Perëndimor dhe në Gaza.

Aktualisht janë 5.9 milionë refugjatë palestinezë brenda dhe jashtë Palestinës. Ndihmat e UNRWA kanë një rëndësi të madhe për refugjatët palestinezë.