Të paktën 18 palestinezë janë vrarë dhe 785 janë plagosur nga kolonët e paligjshëm izraelitë që nga 7 tetori 2023, tha sot Komisioni Palestinez i Rezistencës ndaj Kolonizimit dhe Murit, transmeton Anadolu.

Në një deklaratë, shefi i komisionit, Moayad Shaaban, zbuloi se 26 komunitete beduine janë zhvendosur me forcë për shkak të sulmeve të paligjshme të kolonëve gjatë kësaj periudhe.

Komisioni dokumentoi 273 zjarre të vëna nga kolonët e paligjshëm në pronat dhe fushat palestineze.

“Ushtria izraelite dhe kolonët e paligjshëm kanë shfrytëzuar agresionin brutal që po kryen shteti okupues në Gaza për të kryer krime të shumta”, tha Shaaban.

“Këto zjarre, të cilat kanë shkaktuar dëme të mëdha, janë një nga format më të spikatura të këtyre krimeve, me incidentin e fundit që ka ndodhur në fshatin Jit, në lindje të Qalqilyas në veri të Bregut Perëndimor”, shtoi ai.

Të enjten në mbrëmje, kolonët e paligjshëm vranë një palestinez, plagosën rëndë një tjetër dhe u vunë flakën katër shtëpive dhe gjashtë automjeteve gjatë një sulmi në fshatin Jit.

Shaaban i përshkroi sulmet me zjarrvënie si një “metodë të qëndrueshme dhe të përshkallëzuar” që shkakton dëme të rënda.

Ai akuzoi Izraelin për “miratimin dhe mbështetjen e këtyre veprimeve si një mjet për terrorizimin e civilëve dhe për t’u shkaktuar atyre humbje të rënda sociale dhe ekonomike”.

“Grupet terroriste po marrin mbështetje zyrtare, duke përfshirë financimin, mbrojtjen dhe imunitetin”, shtoi Shaaban, duke e quajtur këtë si një “sfidë të hapur ndaj ligjeve dhe rezolutave ndërkombëtare që dënojnë projektin e vendbanimeve koloniale dhe institucionet zyrtare të Izraelit”.

Gjatë viteve të fundit, ushtria izraelite ka kryer bastisje të rregullta në Bregun Perëndimor të pushtuar, të cilat janë përshkallëzuar me fillimin e luftës në Gaza më 7 tetor 2023.

Të paktën 633 palestinezë janë vrarë dhe rreth 5.400 të tjerë janë plagosur nga zjarri i ushtrisë izraelite në territorin e pushtuar, sipas Ministrisë së Shëndetësisë.

Në një opinion të rëndësishëm këshillues më 19 korrik, Gjykata Ndërkombëtare e Drejtësisë e shpalli të paligjshëm pushtimin disadekadësh të tokës palestineze nga Izraeli dhe kërkoi evakuimin e të gjitha vendbanimeve kolone ekzistuese në Bregun Perëndimor dhe Kudsin Lindor.