Sulmet ajrore izraelite ndaj Rripit të Gazës kanë vrarë të paktën 86 palestinezë të tjerë brenda ditës së fundit, duke e çuar numrin e përgjithshëm të tyre që nga tetori i vitit 2023 në të paktën 50.609, transmeton Anadolu.

Ministria e Shëndetësisë me bazë në Gaza njoftoi se 287 palestinezë të tjerë u plagosën brenda 24 orëve të fundit si pasojë e sulmeve izraelite, duke e çuar numrin e përgjithshëm të të plagosurve që nga tetori i vitit 2023 në 115.063.

"Shumë viktima akoma mbeten të bllokuar nën rrënoja dhe në rrugë pasi shpëtimtarët nuk mund të arrijnë tek ato", tha ministria palestineze.

Më 18 mars, ushtria nisi një fushatë të papritur ajrore në Rripin e Gazës dhe vetëm që atëherë ka vrarë të paktën 1.249 palestinezë dhe ka plagosur 3.022 të tjerë. Kjo fushatë e fundit nisi pavarësisht marrëveshjes së armëpushimit dhe shkëmbimit të të burgosurve me Hamasin, e cila hyri në fuqi në muajin janar.

Nëntorin e viti të kaluar, Gjykata Ndërkombëtare Penale (GJNP) lëshoi ​​urdhër-arreste ndaj kryeministrit izraelit, Benjamin Netanyahu dhe ish-ministrit të Mbrojtjes, Yoav Gallant, duke i akuzuar për krime lufte dhe krime kundër njerëzimit në Gaza.

Izraeli për luftën në enklavën palestineze gjithashtu përballet me një çështje gjenocidi në Gjykatën Ndërkombëtare të Drejtësisë (GJND).