Të paktën nëntë libanezë u vranë dhe pesë të tjerë u plagosën në një sulm ajror izraelit gjatë natës në qytetet jugore të Libanit, transmeton Anadolu.

Sipas Agjencisë Kombëtare të Lajmeve të Libanit, Ministria libaneze e Shëndetësisë ka njoftuar sot se sulmi ajror i fundit izraelit në zonën Wadi al-Kfour në Nabatieh ka vrarë nëntë civilë, duke përfshirë një grua dhe dy fëmijët e saj.

Pesë të tjerë janë plagosur në sulm, me dy në gjendje kritike, sipas një raporti fillestar nga ministria, shtoi agjencia.

Paralelisht, ushtria izraelite konfirmoi sulmin, duke deklaruar se avionët e saj luftarakë shënjestruan disa ndërtesa ushtarake të lidhura me Hezbollahun në zonat e Hanin dhe Maroun al-Ras.

Ajo gjithashtu raportoi një sulm në rajonin Nabatieh, duke pretenduar se ka shënjestruar një vendndodhje ushtarake të Hezbollahut.

Shqetësimet janë rritur për një luftë të plotë midis Izraelit dhe Hezbollahut mes një shkëmbimi sulmesh ndërkufitare, veçanërisht pas vrasjes së komandantit të Hezbollahut, Fuad Shukr, në Bejrut më 30 korrik.

Përshkallëzimi vjen në sfondin e sulmeve vdekjeprurëse izraelite në Gaza, ku janë vrarë mbi 40.000 njerëz që nga tetori i vitit të kaluar.