Azerbajxhani zbulon varrezë të re masive në Shusha

Azerbajxhani ka zbuluar një varr të ri masiv në qytetin Shusha në rajonin e Karabakut, transmeton Anadolu.

Sipas agjencisë shtetërore të lajmeve Azertac, eshtrat e 17 personave u zbuluan në territorin e burgut të Shushës gjatë gërmimeve të kryera midis 1-15 gushtit nga Komisioni Shtetëror i Azerbajxhanit për të Burgosurit e Luftës, Pengjet dhe Personat e Zhdukur.

Hikmet Hajiyev, këshilltar i presidentit të Azerbajxhanit, shkroi në rrjetet sociale se Armenia vazhdon të refuzojë të japë informacion për vendndodhjen e varreve masive për t'iu shmangur përgjegjësive.

Në qershor, Azertac raportoi zbulimin e një varri masiv në fshatin Saricali të qarkut Agdam, ku u gjetën eshtrat e katër personave.

Rajoni i Karabakut ka qenë vendi i vrasjeve dhe varrimeve masive që nga Lufta e Parë e Karabakut në fillim të viteve 1990, gjatë së cilës ushtria armene pushtoi Karabakun, një territor i njohur ndërkombëtarisht si pjesë e Azerbajxhanit, dhe shtatë rajone ngjitur, duke përfshirë Agdamin.

Në vjeshtën e vitit 2020, në 44 ditë luftimesh, Azerbajxhani çliroi disa qytete, fshatra dhe vendbanime nga pushtimi armen. Marrëveshja e paqes e ndërmjetësuar nga Rusia festohet si një triumf në Azerbajxhan.