Blinken: Tërheqja e Rusisë nga marrëveshja e drithërave “e pandërgjegjshme”

Sekretari i Shtetit i SHBA-së, Antony Blinken, ka deklaruar se vendimi i Rusisë për t’u tërhequr nga marrëveshja e drithërave të Detit të Zi është i “pandërgjegjshëm”, transmeton Anadolu.

Para gazetarëve në Departamentin e Shtetit, sekretari amerikan tha se marrëveshja “duhet të rivendoset sa më parë”.

“Shpresoj që çdo vend po e shikon këtë nga afër. Ata do të shohin se Rusia është përgjegjëse për mohimin e ushqimit për njerëzit që kanë nevojë dëshpërimisht në mbarë botën, si dhe për kontributin e saj në rritjen e çmimeve në një kohë kur shumë vende vazhdojnë të përjetojnë deflacion shumë të vështirë”, tha Blinken.

Ai tha se marrëveshja e drithërave është bërë e nevojshme për shkak të luftës së Rusisë ndaj Ukrainës, si dhe akuzoi Moskën për përdorimin e ushqimit si armë.

Më herët, Kremlini njoftoi se ka pezulluar marrëveshjen, duke theksuar se pjesa ruse e marrëveshjes nuk u zbatua.

Marrëveshja, e nënshkruar fillimisht në korrik të vitit të kaluar në Istanbul nga Türkiye, Kombet e Bashkuara (OKB), Rusia dhe Ukraina, kishte për qëllim rifillimin e eksporteve të drithërave nga portet ukrainase. Këto eksporte u ndaluan si rezultat i luftës ruso-ukrainase, e cila filloi në shkurt të vitit 2022.

Vitin e kaluar, një qendër e përbashkët koordinimi u ngrit në Istanbul me zyrtarë nga të tre vendet dhe OKB-ja për të mbikëqyrur dërgesat.

Marrëveshja është rinovuar disa herë që atëherë, ndërsa së fundmi më 18 maj u zgjat për dy muaj të tjerë.