Danimarka do t'i dhurojë Ukrainës automjete luftarake CV90

Danimarka do t'i bashkohet Suedisë në dhurimin e automjeteve luftarake të këmbësorisë CV90, si dhe në prodhimin e automjeteve të reja me vlerë prej rreth 264 milionë dollarë për Ukrainën, transmeton Anadolu.

Vendimi i Ministrisë daneze të Mbrojtjes vjen pas kërkesës së Ukrainës për më shumë automjete, pasi Suedia dhuroi 50 CV90.

"Ky është një hap i rëndësishëm për të mbështetur forcat e mbrojtjes së Ukrainës së bashku me Danimarkën", tha në një deklaratë ministri suedez i Mbrojtjes Pal Jonson, duke shtuar "mjeti luftarak CV90 ka qenë dhe është një shtesë e rëndësishme për mbrojtjen e Ukrainës, që kur Suedia dhuroi 50 automjete më herët këtë vit".

Kjo do të ndihmojë në financimin dhe mbështetjen e prodhimit të automjeteve të reja, si dhe pjesëve rezervë, municionit dhe mirëmbajtjes pas dorëzimit.

Danimarka propozoi një pako të re të donacioneve ushtarake javën e kaluar për Ukrainën me vlerë 1.1 miliardë dollarë, pas një takimi të papritur të mbajtur të mërkurën midis liderëve nordikë dhe presidentit të Ukrainës, Volodymyr Zelenskyy, në një samit nordik në Norvegji.

Marrëveshja dypalëshe është një "kontribut i rëndësishëm në ambicien tonë të përbashkët për të vazhduar të mbështesim luftën e Ukrainës për liri”, tha Ministria Daneze e Mbrojtjes.

Danimarka edhe më herët e kishte mbështetur Ukrainën ushtarakisht, në vlerë prej rreth 3.9 miliardë dollarë, si dhe në ndihmë civile në vlerë prej rreth 411 milionë dollarë.