Ekipet e Frontexit në Mal të Zi nga 1 korriku

Bashkimi Evropian (BE) do të vendosë rojet e saj kufitare në Mal të Zi për të menaxhuar flukset e migracionit, transmeton Anadolu.

Këshilli i BE-së njoftoi se ka vendosur të nënshkruajë një marrëveshje për aktivitetet operacionale të Agjencisë së Rojës Kufitare dhe Bregdetare të BE-së (Frontex) në Mal të Zi.

“Marrëveshja mundëson që ekipet e menaxhimit të kufirit Frontex të vendosen në Mal të Zi dhe të organizohen operacione të përbashkëta”, thuhet në njoftim.

Gjithashtu shtohet se ata mund të ndihmojnë Malin e Zi në menaxhimin e flukseve të migracionit, luftimin e imigracionit të paligjshëm dhe krimit ndërkufitar.

Siç paralajmërohet, masat do të zbatohen përkohësisht nga 1 korriku.

Frontex në shumë raste është kritikuar nga Parlamenti Evropian dhe organizatat e të drejtave të njeriut për ndihmën e autoriteteve greke duke dëbuar në mënyrë të paligjshme azilkërkuesit në kufijtë detarë dhe tokësorë.