Francë, si pasojë e të nxehtit shënohet norma më e lartë e vdekjeve në 19 vitet e fundit

Gjatë verës së këtij viti në Francë ku u përjetua i nxehti përvëlues, u regjistrua norma më e lartë e vdekjeve në 19 vitet e fundit, transmeton Anadolu Agency (AA).

BFMTV në lajmin e saj ku paraqet normat e përditësuara të vdekjeve të Institutit Kombëtar Francez të Statistikave dhe Kërkimeve Ekonomike (INSEE) ka vendosur fokusin mbi mundësinë se rritja e madhe e vdekjeve në muajin korrik në vend është e lidhur me temperaturat përvëluese që filluan në fund të qershorit.

Në muajin korrik, mesatarisht 1.750 persona në ditë kanë humbur jetën në Francë ku temperaturat e larta verore përkuan me valën e shtatë të pandemisë së COVID-19. Ndërsa kjo shifër në muajin qershor ka qenë 1.610.

Në muajin korrik, për shkak të temperaturave të larta numri i vdekjeve u rrit me 13 për qind, në krahasim me korrikun 2019 ku nuk kishte pandemi të COVID-19.

- Vera ku u shënuan më shumë vdekje që nga viti 2003

Vera e këtij viti në krahasim me verën 2021 shënoi rritje me 5.7 për qind sa i përket numrit të vdekjeve ku humbën jetën 138.552 persona. Ndërsa në krahasim me verën e vitit 2019 kjo normë u rrit në 11.6 për qind.

Rikujtohet se 133.069 persona humbën jetën në verën e vitit 2003 e cila hyri në historinë e Francës për shkak të normës së lartë të vdekjeve.

Agjencia e Shëndetit Publik në tetor do të publikojë raportin lidhur me numrin e vdekjeve në periudhën e verës si pasojë e temperaturave të larta.