Javët e fundit në Greqi, qindra fëmijë refugjatë të pashoqëruar në ishujt e Egjeut jetojnë në kushte të vështira në qendrat e akomodimit që tejkalojnë kapacitetin e tyre, transmeton Anadolu.

Në lajmet e mediave greke thuhet se situata në ishuj është "e rëndë" dhe se numri i fëmijëve në "qendrat e akomodimit, që konsiderohen zona të sigurta", e kalon dyfishin e kapacitetit.

Raportohet se shumë qendra strehimi për fëmijë të pashoqëruar janë nën presion serioz financiar dhe se organizatat joqeveritare që operonin strehimoret nuk mund të merrnin fondet e Bashkimit Evropian (BE) për muaj të tërë dhe se punonjësit e tyre vazhdojnë të punojnë pa marrë rrogat e tyre.

Përveç kësaj, në lajm thuhet se disa fëmijë të pashoqëruar u detyruan të jetonin në rrugë dhe se qeveria nuk kishte hartuar plan urgjent për të adresuar këtë problem dhe se ekzistonte shqetësimi se kriza do të thellohej më tej me shterimin e fondeve evropiane në periudhën e ardhshme.