Përleshjet midis forcave të qeverisë siriane dhe lojalistëve të presidentit të rrëzuar Bashar Asad kanë lënë gati 200 të vdekur, duke shënuar dhunën më të përgjakshme që nga përmbysja e Asadit në dhjetor, transmeton Anadolu.

Observatori Sirian për të Drejtat e Njeriut (SOHR) me seli në Mbretërinë e Bashkuar raportoi se luftimet shpërthyen të enjten kur militantët pro Asadit u zunë pritë forcave të sigurisë në Latakia, një provincë bregdetare dhe ish-bastion i mbështetësve alevitë të liderit të rrëzuar. Si përgjigje, luftëtarët e mbështetur nga qeveria bastisën disa fshatra.

“Ata vranë çdo njeri që takuan”, tha shefi i SOHR-së Rami Abdurrahman, duke përshkruar shkallën e hakmarrjes.

SOHR-ja tha se të vdekurit përfshijnë të paktën 50 trupa qeveritare dhe 45 luftëtarë pro Asadit, me viktima shtesë në fshatrat e synuara. Televizioni Al-Mayadeen i Libanit raportoi se më shumë se 30 burra janë vrarë në Mukhtariyeh.

Agjencia shtetërore siriane e lajmeve SANA citoi një zyrtar të paidentifikuar të sigurisë, i cili ka pranuar se disa “shkelje individuale” kanë ndodhur ndërsa njerëzit kërkuan hakmarrje për sulmet e fundit ndaj forcave qeveritare.

Në përgjigje të krizës në përshkallëzim, presidenti i përkohshëm i Sirisë, Ahmed al-Sharaa, u zotua të ndjekte “mbetjet” e regjimit të Asadit dhe t’i çonte në gjyq. Administrata e tij, e cila doli nga rebelimi i udhëhequr nga grupet që rrëzuan Asadin, është zotuar t’i japë fund dhunës sektare dhe të bashkojë kombin e shkatërruar nga lufta.

I dërguari i posaçëm i OKB-së për Sirinë, Geir Pedersen, u bëri thirrje të gjitha palëve të “përmbahen nga veprimet që mund të nxisin më tej tensionet, të përshkallëzojnë konfliktin, të përkeqësojnë vuajtjet e komuniteteve të prekura, të destabilizojnë Sirinë dhe të rrezikojnë një tranzicion politik të besueshëm dhe gjithëpërfshirës”.

Me forcat qeveritare që përforcojnë pozicionet në Latakia, Tartus dhe Jableh, shtetrrethimi mbetet në fuqi dhe tensionet vazhdojnë të jenë të larta në bastionet bregdetare të ish-sundimtarit të Sirisë.