Gjermani, arrestohen disa persona pas trazirave në Berlin

Policia gjermane kreu arrestime pasi disa të rinj hodhën kokteje molotovi dhe gurë ndaj efektivëve gjatë trazirave në lagjen "Maerkisches Viertel" të Berlinit të dielën vonë, njoftoi transmetuesi publik RBB, transmeton Anadolu.

Sipas RBB-së, një grup prej më shumë se 100 të rinjsh ishte mbledhur në zonë duke ndezur fishekzjarrë dhe duke shtyrë kosha plehrash në flakë në mes të rrugës. Nga turma u hodhën dy kokteje molotovi dhe gurë drejt policisë, por nuk u raportua për të lënduar.

Policia ndaloi të paktën 4 persona, përfshirë një 14-vjeçar dhe të tjerë të dyshuar për hedhjen e mjeteve shpërthyese të improvizuara ose për prishje të rendit publik, bëri të ditur RBB. Më vonë situata u qetësua dhe në vendngjarje mbetën vetëm grupe të vogla të rinjsh, informoi policia transmetuesin.

Këto trazira pasuan incidente të ngjashme të ndodhura një natë më parë, gjatë festës së Halloween-it, kur të rinj në të njëjtën lagje sulmuan në mënyrë të përsëritur autobusët e transportit publik të Berlinit me vezë dhe fishekzjarrë, duke ndërprerë shërbimin.

Të shtunën u zhvilluan protesta studentore në mbarë vendin kundër politikave qeveritare, ku shumica e demonstratave kaluan në mënyrë paqësore. Megjithatë, pas errësirës, ​​u raportuan akte të izoluara dhune në Berlin, Frankfurt dhe Hamburg.