Gjermania do të reduktojë ndihmën ushtarake për Ukrainën për shkak të kufizimeve buxhetore
Kancelari Olaf Scholz thuhet se ka kundërshtuar çdo miratim të ri të ndihmës ushtarake
![Gjermania do të reduktojë ndihmën ushtarake për Ukrainën për shkak të kufizimeve buxhetore](https://cdnuploads.aa.com.tr/uploads/Contents/2024/08/17/thumbs_b_c_edc991f92f1b2dda82fde4ec4299f404.jpg?v=173458)
Berlin
Gjermania planifikon të ulë ndihmën e saj ushtarake për Ukrainën për shkak të kufizimeve të ashpra buxhetore, sipas një raportimi lokal, transmeton Anadolu.
Bazuar në planifikimin aktual të buxhetit, qeveria federale nuk dëshiron më t’i ofrojë Ukrainës ndonjë pagesë të re ndihme për arsye kursimi, raportoi gazeta Frankfurter Allgemeine Sonntagszeitung (FAS), duke cituar dokumente dhe komunikim me postë elektronike midis ministrive gjermane.
Gjermania, e cila është një nga aleatët më të rëndësishëm të Ukrainës në luftën kundër Rusisë që filloi në shkurt 2022, do të ofrojë vetëm ndihmën ushtarake që tashmë është miratuar. Kancelari Olaf Scholz thuhet se ka kundërshtuar çdo miratim të ri të ndihmës ushtarake.
E përditshmja tha se ministri i Financave Christian Lindner ka bërë një kërkesë përkatëse në një letër drejtuar ministrit të Mbrojtjes Boris Pistorius dhe ministres së Jashtme Annalena Baerbock më 5 gusht.
Ajo tha se “masa të reja” duhet të merren vetëm nëse planet buxhetore për këtë dhe vitet e ardhshme janë të siguruara financiarisht.
Në të ardhmen, Gjermania dhe BE-ja po planifikojnë të përdorin fitimet e marra nga asetet e ngrira ruse për ndihmën ushtarake për Ukrainën.
Disa qeveri, duke përfshirë SHBA-në, Australinë, Japoninë dhe vendet e BE-së, kanë ngrirë ose imobilizuar asetet sovrane ruse me vlerë mbi 280 miliardë dollarë që nga viti 2022.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.