Mbi 200 hebrenj italianë nënshkruan një apel publik përmes të përditshmes La Repubblica për të kundërshtuar spastrimin etnik në Gaza, transmeton Anadolu.

“Hebrenjtë italianë thonë: Jo spastrimit etnik! Italia nuk duhet të jetë bashkëpunëtore”, thuhet në tekstin e apelit të publikuar dje.

Në tekst theksohet se presidenti amerikan Donald Trump dëshiron të dëbojë palestinezët nga Gaza, duke shtuar se në Bregun Perëndimor, "dhuna e qeverisë izraelite dhe kolonëve vazhdon".

Presidenti amerikan ka bërë thirrje në mënyrë të përsëritur që SHBA të "marrë përsipër" Gazën, e cila është shkatërruar nga bombardimet e pamëshirshme të Izraelit, dhe të zhvendosë popullsinë e saj për të rizhvilluar enklavën si "Riviera e Lindjes së Mesme".

Ideja është hedhur poshtë fuqishëm nga bota arabe dhe kombe të tjera, duke thënë se ajo përbën spastrim etnik.