Irani dhe Katari diskutojnë zgjerimin e bashkëpunimit politik, ekonomik dhe energjetik

Presidenti iranian, Masoud Pezeshkian dhe emiri i Katarit, Sheikh Tamim bin Hamad Al Thani, diskutuan zgjerimin e bashkëpunimit politik, ekonomik dhe energjetik gjatë një takimi në Moskë të martën, sipas mediave shtetërore iraniane, transmeton Anadolu.

Takimi u zhvillua në margjinat e samitit të tetë të Forumit të Vendeve Eksportuese të Gazit (GECF) në Rusi, raportoi Press TV.

Agjencia zyrtare iraniane e lajmeve IRNA njoftoi se të dy liderët shqyrtuan gjendjen e fundit të marrëdhënieve mes Teheranit dhe Dohas dhe theksuan rëndësinë e zgjerimit të lidhjeve politike dhe ekonomike, si dhe të shfrytëzimit të potencialit ekzistues për thellimin e bashkëpunimit dypalësh.

Bashkëpunimi në fushën e energjisë, zgjerimi i marrëdhënieve ekonomike dhe tregtare, si dhe forcimi i koordinimit mes vendeve eksportuese të gazit ishin ndër çështjet e diskutuara, shtoi IRNA.

Të premten, ministri i Jashtëm iranian, Abbas Araghchi, tha se Pezeshkian do të takohej me presidentin rus Vladimir Putin në Moskë gjatë kësaj jave.

Në një postim në Instagram, Araghchi tha se takimi do të shërbente për të vijuar diskutimet e zhvilluara gjatë vizitës së ministrit të Jashtëm rus Sergey Lavrov në Teheran më 19 tetor.

GECF-ja është një organizatë ndërqeveritare që bashkon vende të mëdha prodhuese të gazit natyror, përfshirë Iranin, Rusinë, Katarin dhe Algjerinë.

Kjo ndodh ndërsa Katari vazhdon të ndërmjetësojë mes Iranit dhe SHBA-së, kur negociatat mes dy palëve janë ende në zhvillim.