Saadet Gökce
14 Prill 2026•Përditësim: 14 Prill 2026
Presidenti kinez Xi Jinping bëri thirrje sot për respektimin e sovranitetit, sigurisë dhe mbrojtjes së njerëzve dhe institucioneve në Lindjen e Mesme mes tensioneve të vazhdueshme SHBA-Iran, transmeton Anadolu.
"Sovraniteti, siguria dhe integriteti territorial i vendeve në Lindjen e Mesme dhe rajonin e Gjirit duhet të respektohen plotësisht ndërsa siguria e personelit, objekteve dhe institucioneve të të gjitha vendeve duhet të mbrohet në mënyrë efektive", tha Xi në komentet e tij të para publike mbi rajonin që kur SHBA-ja dhe Izraeli nisën sulme të përbashkëta ndaj Iranit më 28 shkurt.
Komentet erdhën ndërsa Xi u takua me Princin e Kurorës së Abu Dhabit, Sheikh Khaled bin Mohamed bin Zayed Al Nahyan në Pekin, sipas agjencisë shtetërore të lajmeve Xinhua.
Komentet e presidentit kinez, të publikuara nga media shtetërore, nuk përmendën drejtpërdrejt luftën e SHBA-së dhe Izraelit ndaj Iranit. Ai mbështeti ndërtimin e një kuadri rajonal sigurie "të përbashkët, gjithëpërfshirës, bashkëpunues dhe të qëndrueshëm" dhe propozoi një plan me katër pika për të promovuar paqen dhe stabilitetin në Lindjen e Mesme.
Propozimi thekson respektimin e bashkëjetesës paqësore, sovranitetit kombëtar, ligjit ndërkombëtar si dhe koordinimin e zhvillimit dhe sigurisë. Sheikh Khaled mbërriti në Kinë të dielën për një vizitë tre-ditore.
Vizita vjen në mes të një përshkallëzimi rajonal që kur SHBA-ja dhe Izraeli nisën sulme të përbashkëta ndaj Iranit më 28 shkurt, megjithatë, të dyja palët aktualisht po respektojnë një armëpushim dyjavor, të ndërmjetësuar nga Pakistani dhe të mbështetur nga Kina, që nga 8 prilli.
Vëllimi i tregtisë dypalëshe midis Kinës dhe Emirateve të Bashkuara Arabe arriti në 76.93 miliardë dollarë nga janari deri në shtator 2025, sipas të dhënave nga faqja e internetit e Ministrisë së Jashtme kineze.
