Kompanitë e mëdha ajrore amerikane dhe britanike pezulluan fluturimet drejt Izraelit

Mediat izraelite njoftuan se disa kompani ajrore amerikane dhe britanike anuluan fluturimet e tyre drejt Izraelit për shkak të krizës në rritje të sigurisë, transmeton Anadolu.

Sipas radios së ushtrisë izraelite, linjat ajrore amerikane "Delta", "United" dhe "British Airways" anuluan fluturimet e tyre për në Izrael.

Thuhet se fluturimet janë anuluar pas vrasjes së Fuad Shukr, një nga komandantët e Hezbollahut, në sulmin ajror të Izraelit në kryeqytetin e Libanit, Bejrut, të martën.

Kompania "Delta Airlines" ndaloi fluturimet për në Izrael deri më 2 gusht ndërsa "United Airlines", e cila kryen 14 fluturime në javë midis New Yorkut dhe Izraelit, ndaloi fluturimet e saj drejt Izraelit deri më 6 gusht.

Gazeta "Haaretz" shkroi se "British Airways" anuloi fluturimet e saj drejt vendit të enjten.

Faqja e lajmeve "Times of Israel" raportoi se këto anulime do të shkaktojnë ngecjen e dhjetëra mijëra izraelitëve në SHBA dhe paralajmëroi se anulimet e fluturimeve nga "kompanitë e dyta dhe të treta më të mëdha ajrore në botë" "United" dhe "Delta" mund të çojnë në një valë anulimesh në kompanitë e tjera ajrore.

Të hënën, Austria dhe "Lufthansa" njoftuan se kanë anuluar përkohësisht fluturimet e tyre në aeroportin "Ben Gurion" të Tel Avivit në Izrael.