Koreja e Veriut dënon ashpër sulmet e SHBA-së dhe Izraelit ndaj Iranit

Koreja e Veriut ka dënuar fushatën ushtarake SHBA-Izrael kundër Iranit në termat e saj "më të ashpër", duke i quajtur sulmet një "akt të paligjshëm agresioni", transmeton Anadolu.

"Sulmi ushtarak i Izraelit ndaj Iranit, i nisur nën mbështetjen dhe patronazhin aktiv të SHBA-së dhe veprimi ushtarak i SHBA-së që iu bashkua atij janë një akt i paligjshëm agresioni dhe forma më e neveritshme e shkeljes së sovranitetit", tha Ministria e Jashtme e Koresë së Veriut në një deklaratë të raportuar nga Agjencia Qendrore Koreane e Lajmeve (KCNA).

Pheniani akuzoi Washingtonin dhe Tel Avivin se vendosin ligjin e tyre të brendshëm mbi ligjin ndërkombëtar dhe abuzojnë me forcën ushtarake për të ndjekur "ambicie egoiste dhe hegjemonike". Ajo tha se veprimet e SHBA-së po shkatërrojnë "paqen dhe stabilitetin global".

"Lufta e agresionit nga SHBA-ja dhe Izraeli, e cila nuk mund të justifikohet kurrë me asgjë, nuk mund të tolerohet kurrë në asnjë rast", tha ministria.

Fushata e përbashkët ushtarake SHBA-Izrael e nisur të shtunën ka vrarë disa zyrtarë të lartë iranianë, përfshirë udhëheqësin suprem Ajatollah Ali Khamenei. Teherani është hakmarrë me sulme me dronë dhe raketa që synojnë vendet e Gjirit. Tre anëtarë të shërbimit amerikan janë vrarë dhe pesë janë plagosur rëndë.