Riyaz Khaliq
24 Qershor 2020•Përditësim: 24 Qershor 2020
Koreja e Veriut tha se ka vendosur të pezullojë "aksionin ushtarak" kundër Koresë së Jugut gjatë një takimi virtual të Komisionit Qendror Ushtarak të Partisë Punëtore të Koresë (WPK), raporton Anadolu Agency (AA).
Agjencia Qendrore e Lajmeve e Koresë e drejtuar nga shteti raportoi se udhëheqësi i Koresë së Veriut Kim Jong-un kryesoi takimin të martën vonë, i cili shqyrtoi çështjet e rendit të ditës përfshirë "forcimin e mëtejshëm të parandalimit të luftës së vendit".
"Në mbledhjen paraprake, Komisioni Qendror Ushtarak i WPK-së mori në konsideratë situatën mbizotëruese dhe pezulloi planet e veprimit ushtarak kundër Jugut të sjellë në takimin e pestë të Komisionit Qendror Ushtarak nga Shtabi i Përgjithshëm i Ushtrisë Popullore Koreane", thuhet në raport.
Deklarata erdhi pas intensifikimit të tensioneve midis dy vendeve javën e kaluar për shkak të përhapjes së fletushkave kundër Phenianit nga brendësia e kufirit të Koresë së Jugut.
Koreja e Veriut javën e kaluar urdhëroi ushtrinë e vendit të godiste dhe të shkatërrojë zyrën e ndërlidhjes ndër-Koreane në kufirin e tyre të ndërsjellë.
Sulmi ndaj zyrës ndër-Koreane, një simbol i marrëdhënieve të mira midis Veriut dhe Jugut, i kushtoi me vendin e punës ministrit të Bashkimit të Koresë së Jugut, Kim Yeon-chul, i cili dha dorëheqjen dhe mori përgjegjësinë për prishjen e komunikimeve midis vendeve.
Koreja e Jugut gjithashtu kërkoi që të ndalohet menjëherë fushata të tilla me broshura.
"Fletushkat, qoftë nga Veriu apo Jugu, nuk u sjellin asgjë marrëdhënieve ndër-Koreane, dhe të dy udhëheqësit ranë dakord në Deklaratën e Panmunjom për të ndaluar fletushkat", u citua të thoshte një zyrtar i ministrisë.
Pheniani ka akuzuar Seulin për dështimin për të ndaluar propagandën që synonte poshtërimin e Veriut.
Ndërkohë, autoritetet e Koresë së Veriut gjithashtu u raportua se kishin hequr të paktën 10 "altoparlantë propagandistikë", të cilët ishin instaluar përsëri përgjatë kufirit me Jugun, raportoi "Yonhap News".
Masa erdhi pasi Kim urdhëroi pezullimin e planeve të veprimit ushtarak kundër Jugut. Rreth 20 altoparlantë të tillë u ngritën nga Pheniani përgjatë zonave kufitare me Jugun gjatë ditëve të kaluara.
Teknikisht, të dy vendet mbeten në luftë pasi armiqësitë e Luftës Koreane përfunduan me armëpushimin e vitit 1953, por një traktat paqeje nuk u nënshkrua kurrë.
