Lideri i Koresë së Veriut, Kim Jong-un, tha se rezultati i negociatave të tyre të kaluara me SHBA-në ka qenë "politika pushtuese dhe armiqësore" e pandryshueshme ndaj vendit të tyre, transmeton Anadolu.

Sipas lajmit të Yonhap që e bazon në Agjencinë Qendrore të Lajmeve të Koresë së Veriut (KCNA), duke folur në ekspozitën e armëve të emërtuar "Zhvillimi i Mbrojtjes Kombëtare-2024" që u mbajt në kryeqytetin Phenian, Kim tha se Koreja e Veriut "provoi çdo rrugë" në negociatat me Shtetet e Bashkuara të Amerikës, por se rezultati ka qenë "politika e pandryshueshme pushtuese dhe armiqësore" e SHBA-së ndaj Koresë së Veriut.

Kim deklaroi se "arritja e kapaciteteve më të forta ushtarake është mënyra e vetme për të ruajtur paqen" dhe vuri në dukje se ky aktivitet garanton sigurinë dhe zhvillimin.

Koreja e Veriut nuk do të tolerojë shkeljen e sigurisë së saj në asnjë rrethanë, theksoi Kim, i cili nënvizoi se vendi do të zhvillojë kapacitetin e tij vetëmbrojtës "në mënyrë më agresive dhe të pakufizuar" për t'iu përgjigjur kërcënimeve vazhdimisht në zhvillim.