Kremlini ka bërë të ditur se presidenti rus, Vladimir Putin, ka zgjedhur personalisht përfaqësuesit për negociatat e ardhshme Rusi-SHBA në Arabinë Saudite, transmeton Anadolu.

Duke folur në një konferencë për media në Moskë, zëdhënësi i Kremlinit, Dmitry Peskov, i përshkroi si diplomatë shumë të aftë krerët e delegacionit të emëruar, përkatësisht ish-zëvendës ministrin e jashtëm dhe ligjvënës aktual, Grigory Karasin, së bashku me oficerin e lartë të inteligjencës, Sergey Beseda.

“Këta individë kanë përvojë të madhe në negociatat diplomatike. Kjo është zgjedhje e presidentit të Federatës Ruse dhe ata do ta përfaqësojnë më së miri Rusinë në këto bisedime”, tha Peskov.

I pyetur për sulmet e mundshme amerikano-izraelite në objektet bërthamore të Iranit, Peskov ripohoi qëndrimin e Rusisë se çështja duhet të zgjidhet vetëm përmes mjeteve diplomatike.

“Ne jemi të bindur se programi bërthamor i Iranit duhet të trajtohet ekskluzivisht përmes kanaleve paqësore politike dhe diplomatike. Nuk ka asnjë arsye për ta besuar se Irani po zhvillon armë bërthamore dhe gjithçka e nevojshme për një rezolutë është tashmë në vend, nevojitet vetëm vullnet politik”, theksoi ai.

Më 7 mars, presidenti i SHBA-së, Donald Trump, në rrjetet sociale njoftoi se ai i ka dërguar një mesazh liderit suprem të Iranit, Ali Khamenei, duke propozuar negociata për programin bërthamor të Teheranit.

Khamenei i hodhi poshtë komentet e Trumpit, duke i quajtur një “mashtrim të opinionit publik botëror”.

Peskov gjithashtu shprehu shqetësime për militarizimin në rritje të Evropës, duke e quajtur atë “një prirje shumë të rrezikshme”.

“Kjo sigurisht që nuk e afron botën më afër frenimit ose besimit të ndërsjellë, as nuk rrit sigurinë e Evropës”, tha ai.

Duke iu drejtuar raporteve të mediave që sugjeronin se kryeministri armen, Nikol Pashinyan, ka udhëzuar agjencitë qeveritare të “rivendosin lidhjet” me Rusinë, Peskov hodhi poshtë idenë se marrëdhëniet janë ndërprerë.

“Armenia është një vend mik për ne. Është një shtet sovran, por ne ndajmë lidhje të thella historike, kulturore dhe dypalëshe, si dhe pjesëmarrje të përbashkët në strukturat kyçe të integrimit si Unioni Ekonomik Euroaziatik (EAEU). Ne jemi të kënaqur me angazhimin e Armenisë për të mbajtur marrëdhënie të forta dypalëshe dhe jemi të gatshëm t'i zhvillojmë ato më tej në çdo mënyrë të mundshme", tha ai.

Së fundmi, Armenia iu bashkua Gjykatës Penale Ndërkombëtare dhe nisi procesin e anëtarësimit në BE, lëvizje që Rusia i ka konsideruar si "jomiqësore".