Kryediplomati i Kinës do të vizitojë Indonezinë pas udhëtimit në Korenë e Jugut

Diplomati i lartë kinez, Wang Yi, do të vizitojë Indonezinë pas udhëtimit të tij në Korenë e Jugut, tha të mërkurën Ministria e Jashtme e Kinës, transmeton Anadolu.

Wang do të vizitojë Seulin dhe Xhakartën me ftesë të homologut të tij të Koresë së Jugut, Cho Hyun dhe Ministrit të Jashtëm indonezian, Sugiono.

Cho do të presë ministrin Wang për bisedime të mërkurën përpara takimit të pritshëm të ministrit të Jashtëm kinez me presidentin e Koresë së Jugut, Lee Jae Myung të enjten.

Gjatë vizitës së tij në Indonezi, Wang do të kryesojë konferencën e parë të Mekanizmit Gjithëpërfshirës të Dialogut Strategjik Kinë-Indonezi dhe do të marrë pjesë, së bashku me shefin e mbrojtjes kineze, Dong Jun, në takimin e dytë të Dialogut të Përbashkët Ministror të Jashtëm dhe Mbrojtjes.

Zëdhënësi i Ministrisë së Jashtme të Kinës, Lin Jian tha se është me "rëndësi të madhe" për Kinën dhe Indonezinë që "të forcojnë komunikimin strategjik, solidaritetin dhe bashkëpunimin".

Gjatë Dialogut të tyre të dytë 2+2 të Ministrave të Jashtëm dhe të Mbrojtjes, të dy palët do të kenë një "shkëmbim të thelluar pikëpamjesh... mbi bashkëpunimin politik, sigurinë, mbrojtjen dhe situatën ndërkombëtare e rajonale," vuri në dukje ai.

Të dyja palët do të "bëjnë përpjekje të koordinuara për të avancuar bashkëpunimin për zhvillimin dhe sigurinë dhe për të nxitur ndërtimin e një komuniteti Kinë-Indonezi me një të ardhme të përbashkët që mbart ndikim rajonal dhe global në mënyrë që të sjellë më shumë përfitime për popullin e Kinës dhe Indonezisë dhe të japë një kontribut të mirë për paqen dhe zhvillimin në rajon dhe më gjerë", u tha Lin gazetarëve në Pekin.