Macron i cilëson "skandal" kritikat e kryeministrit polak

Presidenti i Francës, Emmanuel Macron, i ka cilësuar si "skandal" dhe "të pabaza" kritikat ndaj tij nga kryeministri polak, Mateusz Morawiecki, transmeton Anadolu Agency (AA).

Macron në kanalin TF1 foli lidhur me kritikat e kryeministrit polak, ku akuzoi atë për ndërhyrje në fushatën zgjedhore presidenciale në Francë.

Më tej, Macron tha se Morawiecki mbështetet nga një parti e ekstremit të djathtë dhe se ai ka biseduar disa herë me Marine Le Pen, kandidaten për presidente nga ekstremi i djathtë në Francë.

Duke theksuar se me bisedat që ka zhvilluar me presidentin e Rusisë, Vladimir Putin, ka marrë përsipër përgjegjësinë, Macron tha se bisedimet me Putin janë të rëndësishme për të siguruar paqen në Ukrainë.

Më 5 prill, Morawiecki i kërkoi Perëndimit të forcojë sanksionet dhe embargon ndaj burimeve ruse, ndërsa duke iu referuar presidentit Macron, ai u shpreh: "Zoti Macron, sa herë keni biseduar me Putin-in... a keni arritur ndonjë gjë? Nuk ka ndonjë situatë për të negociuar me fajtorët".