Zeynep Hilal Karyağdı
08 Gusht 2020•Përditësim: 09 Gusht 2020
Përdoruesit e medias sociale dhe aktivistët arabë kanë komentuar se pas qëndrimit dhe mënyrës së presidentit francez, Emmanuel Macron, në Liban pas shpërthimit në Bejrut qëndron "mentaliteti kolonial" raporton Anadolu Agency (AA).
Macron pas shpërthimit të madh më 6 gusht vizitoi Bejrutin. Mënyra e shprehjes së tij gjatë vizitës ka shkaktuar reagime ndaj presidentit francez, i cili u takua me zyrtarë libanezë dhe i cili u shpreh se qëllimi i vizitës së tij ishte "të japë mesazhin se populli i Francës solidarizohet me popullin e Libanit dhe janë pranë familjarëve të personave që kanë humbur jetën dhe të plagosurve, si dhe për të dëgjuar një deklaratë lidhur me arsyen e shpërthimit".
Përdoruesit e medias sociale arabe reaguan ndaj vizitës së presidentit Macron pas shpërthimit dhe deklaratave të tij të ndryshme se në Liban duhet të ndërtohet "një rend i ri politik".
Basheer Nafi, një historian palestinez që jeton në Britani, në llogarinë e tij në twitter lidhur me vizitën e presidentit Macron është shprehur se, "Franca nuk kishte parë prej kohësh një presidenti si Emmanuel Macron, i cili nuk mund të frenojë anën e tij imperialiste".
"Njeriu (Macron) flet pa u turpëruar për hyrjen në një periudhë të re të jetës politike të Libanit. Në vizitën e shkurtër që bëri në Bejrutin e përballur me fatkeqësi sillet sikur ende Libani është koloni franceze" deklaroi Nafi.
Aktivisti jemenas, Yemani bin Islam es-Salimi, ka shkruar se, "Jetojmë në shekullin 21. Bota tashmë është më e fortë. Ka kaluar koha e kolonive. Por ajo vazhdon në mendjen e presidentit francez, Emmanuel Macron".
Salimi ka vlerësuar më tej se, "Macron flet për ndryshim politik, ekonomik dhe të regjimit shoqëror në Liban. Sillet sikur Libani është ende koloni franceze ose një fshat i lidhur me atë".
- "Franca, duket se po e përdor fatkeqësinë e Bejrutit për t‘u rivendosur në rajon"
Gazetari palestinez, Abdulkadir Fayiz, shkroi se, "Macron duke lënë mënjanë krizat brenda vendit dhe dështimin ndërkombëtar, sillet sikur Libani është koloni franceze. Flet për ndryshim të regjimit, për një periudhë të re politike dhe për një Liban të ri".
Franca, roli i së cilës në rajon ka rënë në masë të madhe, "duket se po e përdor fatkeqësinë e Bejrutit për t‘u rivendosur në rajon", vlerësoi ndër të tjera Fayiz.
Ndërsa aktivisti egjiptian, Nur ed-Din, ka vënë theksin se, "Macron flet për një Liban të ri, për një ekonomi më të mirë. Sikur Libani është koloni franceze".
- Shpërthimi në Bejrut dhe Vizita e Macron
Më 4 gusht, në Portin e Bejrutit shpërtheu një zjarr në një depo ku gjendeshin lëndë shpërthyese, pas së cilës ndodhi një shpërthim shumë i fuqishëm që tronditi tërë qytetin. Në shpërthim kanë humbur jetën 154 persona dhe 6 mijë të tjerë u plagosën.
Dy ditë pas shpërthimit Macron vizitoi Bejrutin dhe u takua me presidentin e Libanit, Michel Aoun, kryeministrin Hassan Diab dhe kreun e parlamentit, Nabih Berri.
Në deklaratën e tij pas takimit në rezidencën presidenciale të Libanit, Macron duke u shprehur se ndjen që njerëzit në rrugë janë të zemëruar, deklaroi se, "Duhet të fillohen iniciativa politike të shpejta për luftën kundër korrupsionit. Libani përjeton krizë ekonomike prej vitesh. Për zgjidhjen e kësaj krize nevojitet iniciativë politike".
Ndërsa në një konferencë për media më vonë në rezidencën zyrtare të ambasadës franceze në Bejrut, Macron përdori një gjuhë të hapur në bisedimet me drejtues libanezë, duke theksuar se edhe nga ata pret përgjigje transparente për pyetjet e tij.
"Në fillim të shtatorit do të kthehem përsëri në Liban. Jam i mendimit se ky kërcim (hap) i madh mund të bëhet", tha Macron, duke mos shpjeguar shprehjen "kërcim i madh".
Duke vënë në dukje se ndihmat e premtuara në CEDRE, konferencë për mbështetjen e Libanit të mbajtur në kryeqytetin Paris të Francës në vitin 2018, po presin kryerjen e luftës kundër korrupsionit me reformat për energjinë elektrike, ujin dhe isntitucionet, Macron theksoi se në Liban duhet të ndërtohet një rend i ri politik.
