Merkel: Shtyrja e Brexitit varet nga vota e parlamentit britanik

Kancelarja gjermane Angela Merkel mbështeti kërkesën e kryeministres britanike Theresa May për një shtyrje të shkurtër të Brexitit, por theksoi se kjo duhet kushtëzuar me një votim pozitiv në parlamentin e Britanisë, raporton Anadolu Agency (AA).

Duke folur para ligjvënësve në Bundestag përpara nisjes në Bruksel për një takim dyditor të Bashkimit Evropian (BE), Angela Merkel tha se liderët e të gjitha 27 shteteve të tjera të BE-së do të diskutojnë intensivisht sot kërkesën e kryeministres May për të prolonguar Brexitin deri më 30 qershor.

"Ne mund të pajtohemi me këtë kërkesë, në parim, nëse kemi një votim pozitiv javën e ardhshme në parlamentin britanik mbi dokumentet e tërheqjes", tha ajo.

Merkel tha se krerët e BE-së do të duhet të takohen përsëri javën e ardhshme nëse parlamenti britanik nuk do të votojë mbi dokumentet e Brexitit ose do të votojë kundër marrëveshjes.

Pasi ligjbërësit britanikë refuzuan dy herë marrëveshjen Mayit për Brexitin, kryeministrja britanike kërkoi të mërkurën shtyrjen e datës së largimit nga BE-ja përtej afatit të caktuar për më 29 mars.