Kryeministri i Greqisë, Kyriakos Mitsotakis deklaroi se qeveria e re e Maqedonisë së Veriut shkel Marrëveshjen e Prespës të vitit 2018, transmeton Anadolu.

Mitsotakis mori pjesë në një debat publik me ish-ambasadorin e SHBA-së, Daniel Speckhard, të mbajtur në Këshillin për Marrëdhëniet të Jashtme, një institut me seli në Washington.

"Një nga aspektet themelore, nëse jo më themelorja e kësaj marrëveshjeje kishte të bënte me përdorimin 'erga omnes' të emrit Maqedonia e Veriut. Dhe kjo është diçka shumë e qartë dhe e panegociueshme për Greqinë. Kur dëgjoj se qeveria e re i referohet vendit si Republika e Maqedonisë brenda vendit, kam shqetësime serioze", tha ai, duke shtuar:

"Kjo nuk është konstruktive dhe nuk ndihmon në rrugën evropiane të Maqedonisë së Veriut".

Më 28 qershor, Ministria e Jashtme greke akuzoi Maqedoninë e Veriut për irredentizëm, duke thënë se udhëheqësia e saj po largohet nga marrëdhëniet e fqinjësisë së mirë pas një postimi në rrjetet sociale nga presidentja Gordana Siljanovska-Davkova, në të cilën ajo tha se kishte takuar një delegacion të maqedonasve etnikë nga "Maqedonia e Egjeut", duke iu referuar rajonit të Maqedonisë që ndodhet në pjesën veriore të Greqisë.

Me Marrëveshjen e Prespës, Maqedonia ndryshoi emrin kushtetues në Maqedoni e Veriut dhe kjo i hapi rrugën për anëtarësimin e saj në NATO.

Mitsotakis gjithashtu pranoi se marrëdhëniet me Türkiyen janë përmirësuar ndjeshëm që nga viti i kaluar, duke u shprehur se pas tre vitesh marrëdhënie të turbullta dypalëshe, gjërat janë përmirësuar mes dy aleatëve të NATO-s.

Ai vuri në dukje se disa qëndrime themelore turke në lidhje me Mesdheun Lindor mbeten të pandryshuara. "Ne po bashkëpunojmë më mirë në adresimin e migracionit të parregullt. Ne arritëm një marrëveshje që lejon qytetarët turq të udhëtojnë në disa ishuj të Egjeut përmes një skeme lehtësimi të vizave. Këto janë ndër hapat pozitivë", tha Mitsotakis.