Ndërmjetësuesit në bisedimet e armëpushimit në Gaza njoftuan se propozuan një plan të ri për të tejkaluar boshllëqet midis Izraelit dhe Hamasit, transmeton Anadolu.

“Gjatë 48 orëve të fundit në Doha, zyrtarë të lartë nga qeveritë tona janë angazhuar në bisedime intensive si ndërmjetës që synojnë të përfundojnë marrëveshjen për një armëpushim dhe lirimin e pengjeve dhe të arrestuarve”, thuhet në një deklaratë të përbashkët nga Egjipti, Katari dhe SHBA.

Deklarata i përshkroi diskutimet si “serioze dhe konstruktive, të cilat u zhvilluan në një atmosferë pozitive”.

“Shtetet e Bashkuara, me mbështetjen e Egjiptit dhe Katarit, u paraqitën të dyja palëve (Izraelit dhe Hamasit) një propozim tejkalues ​​që kapërcen boshllëqet e mbetura në mënyrën që lejon një zbatim të shpejtë të marrëveshjes”, thuhet në deklaratë.

Në deklaratë nuk jepen detaje të propozimit të ri, por thuhet se ai është "në përputhje me parimet e përcaktuara nga Presidenti Biden më 31 maj 2024 dhe Rezoluta nr. 2735 e Këshillit të Sigurimit".

Në deklaratë më tej theksohet se ekipet teknike nga Egjipti, Katari dhe SHBA-ja "do të punojnë gjatë ditëve në vijim mbi detajet e zbatimit, duke përfshirë marrëveshjet për zbatimin e dispozitave të gjera humanitare të marrëveshjes, si dhe specifikat në lidhje me pengjet dhe të burgosurit".

Gjithashtu thuhet se zyrtarë të lartë nga të tre vendet do të "takohen sërish në Kajro para fundit të javës së ardhshme me qëllim për të përfunduar marrëveshjen sipas kushteve të paraqitura sot".

Bisedimet vendimtare filluan dje në kryeqytetin e Katarit, Doha, për të arritur një marrëveshje midis Izraelit dhe Hamasit për një shkëmbim pengjesh dhe një armëpushim në Gaza.

Negociatat përfshijnë drejtorin e CIA-s, William Burns, kryeministrin e Katarit Mohammed bin Abdulrahman Al Thani, shefin e inteligjencës egjiptiane, gjeneral Abbas Kamel dhe shefin izraelit të Mossad-it, David Barnea.

Hamasi ka refuzuar të marrë pjesë në këto bisedime, duke kërkuar që Tel Aviv t'i përmbahet marrëveshjeve të arritura në korrik, bazuar në një propozim të mbështetur nga presidenti amerikan Joe Biden në maj, i cili fillimisht u pranua nga Hamasi, sipas mediave izraelite.