Një i dyshuar qëllohet nga policia pranë konsullatës së Izraelit në Mynih
"Oficerët e policisë qëlluan me armë zjarri ndaj një personi të dyshimtë në zonën Karolinenplatz", tha policia e Mynihut në një deklaratë pa dhënë detaje të mëtejshme
![Një i dyshuar qëllohet nga policia pranë konsullatës së Izraelit në Mynih](https://cdnuploads.aa.com.tr/uploads/Contents/2024/09/05/thumbs_b_c_03f63cd4797306a435b8964306c570e1.jpg?v=121124)
Berlin
Policia gjermane ka qëlluar një të dyshuar sot pranë konsullatës së përgjithshme të Izraelit në Mynih, raportojnë mediat lokale, transmeton Anadolu.
Sipas të përditshmes "Süddeutsche Zeitung", i dyshuari është qëlluar pranë një muzeu të krimeve të regjimit nazist, i cili ishte afër konsullatës së përgjithshme të Izraelit në qendër të qytetit.
Disa dëshmitarë kanë pohuar se i dyshuari mbante një armë të gjatë dhe ka qëlluar drejt ndërtesës së muzeut, por këto detaje nuk janë konfirmuar ende nga autoritetet.
"Oficerët e policisë qëlluan me armë zjarri ndaj një personi të dyshimtë në zonën Karolinenplatz", tha policia e Mynihut në një deklaratë të shkurtër të postuar në mediat sociale, pa dhënë detaje të mëtejshme.
Zona është rrethuar menjëherë nga policia dhe njësitë speciale të policisë janë vendosur në zonë si masë paraprake.