Të paktën 11 persona humbën jetën ndërsa dhjetëra të tjerë u plagosën në sulmet që ushtria izraelite kreu në qytetin Tyre (Sur) në jug të Libanit, transmeton Anadolu.

Në një deklaratë nga Ministria libaneze e Shëndetësisë u dha informacion lidhur me sulmet e Izraelit ndaj qytetit Tyre.

Në deklaratë thuhet se 11 persona humbën jetën dhe 48 të tjerë u plagosën në sulmet që ushtria izraelite kreu dje në zona të ndryshme të qytetit Tyre.

- Në sulmet e Izraelit në Liban humbën jetën 3.481 persona

Ushtria izraelite, e cila që nga 8 tetori 2023 ka vazhduar konfliktin e kontrolluar me Hezbollahun, më 23 shtator nisi qindra sulme ajrore në qytetet jugore të Libanit si dhe në rajonet Beqaa dhe Baalbek.

Sipas të dhënave të Ministrisë libaneze të Shëndetësisë, 3.481 persona, përfshirë 210 fëmijë dhe 896 gra, janë vrarë ndërsa 14.786 të tjerë janë plagosur që nga 8 tetori 2023.

Lideri i Hezbollahut, Hassan Nasrallah, u vra në sulmet ajrore të ushtrisë izraelite në Bejrut më 27 shtator.

Ndërkaq, Hezbollahu i përgjigjet me predha dhe raketa Izraelit. Në këto sulme, të cilat kryesisht kishin në shënjestër bazat e ushtrisë në anën izraelite, nuk janë raportuar dëme të mëdha.

Për shkak të bombardimeve izraelite në Liban janë zhvendosur qindra mijëra njerëz.

Vala e migrimit vazhdon nga pjesët jugore të vendit drejt kryeqytetit Bejrut dhe veriut. Sipas të dhënave të OKB-së për shkak të sulmeve izraelite në Liban janë zhvendosur mbi 1.4 milion njerëz. Qeveria libaneze ka njoftuar se më shumë se 600 mijë nga personat e zhvendosur kanë migruar në Siri.