Pakistani pranon ngarkesën e parë me LNG nga Katari që nga korriku

Një anije ngarkese që transportonte rreth 82 mijë tonë metrikë gaz natyror të lëngshëm (LNG) nga Katari mbërriti në Pakistan përmes Ngushticës pothuajse të mbyllur të Hormuzit, transmeton Anadolu.

Anija "Al Marrouna", që transportonte LNG nga terminali Ras Laffan i Katarit, kaloi përmes Ngushticës së Hormuzit të hënën dhe u ankorua sot në mëngjes në portin Qasim të Karaçit, kryeqytetin tregtar të vendit, tha Asad Altaf, zëdhënës i portit.

Kjo shënoi ngarkesën e parë të LNG-së nga Katari për Pakistanin përmes ngushticës së Hormuzit që nga korriku. Sipas Altafit, Islamabadi pranoi ngarkesën e fundit të LNG-së me origjinë nga Katari më 11 korrik.

"Ngarkesat e planifikuara nga 'QatarEnergy' u ndërprenë për shkak të situatës rajonale", shtoi ai. Ngarkesa e re, të cilën Pakistani e siguroi në kuadër të një marrëveshjeje ndërqeveritare me Katarin, pritet të rrisë furnizimin me LNG të vendit të Azisë Jugore dhe të ofrojë lehtësim të përkohshëm për sektorin energjetik.

Ajo ka zbutur shqetësimet për një ndërprerje të zgjatur të furnizimit me LNG nga Katari përmes ngushticës.

Islamabadi dhe Doha kanë luajtur rol aktiv në ndërmjetësimet që po zhvillohen mes SHBA-së dhe Iranit për t'i rikthyer të dyja palët në tryezën e bisedimeve, me qëllim përfundimin e luftës së tyre disa mujore.

Pakistani aktualisht po përballet me ndërprerje të energjisë elektrike prej 6 deri në 12 orë në disa pjesë të vendit, mes rritjes së çmimeve të karburanteve për shkak të armiqësive të reja në Ngushticën e Hormuzit.

Aktualisht, Islamabadi po zbaton një mekanizëm ditor të përcaktimit të çmimeve të karburanteve në përgjigje të tregut të paqëndrueshëm të naftës bruto, duke shkaktuar protesta nga partitë politike.