Departamenti Amerikan i Mbrojtjes (Pentagon) përsëriti mbështetjen e Washingtonit për Tel Avivin, duke deklaruar se Irani "nuk duhet t'u përgjigjet" sulmeve të Izraelit, transmeton Anadolu.

Zëdhënësi i Pentagonit, gjeneralmajori Pat Ryder deklaroi se ai nuk pretendon se Irani do të hakmerret. "Si qeveri amerikane, mendoj se ne e kemi mjaft të qartë se Irani nuk duhet t'u përgjigjet sulmeve të Izraelit. Nëse ata zgjedhin të përgjigjen, sigurisht që ne do të mbështesim Izraelin dhe mbrojtjen e Izraelit", tha Ryder.

Ai thekson se SHBA-ja do të vendosë forca shtesë ushtarake në Lindjen e Mesme në muajt e ardhshëm dhe se bombarduesit B-52 u dërguan në rajon.

"Këto forca ushtarake do të vendosen për të mbrojtur forcat amerikane në rajon dhe për të mbrojtur Izraelin. Ne jemi të gatshëm të mbështesim mbrojtjen e Izraelit dhe shpresojmë që Irani të mos kryejë asnjë sulm hakmarrës", tha Ryder.

Pentagoni njoftoi më 2 nëntor se për të mbrojtur forcat amerikane dhe Izraelin në rajon do të vendosen shkatërruesit shtesë të mbrojtjes raketore balistike, një flotë avionësh luftarakë, cisternë dhe bombardues sulmues me rreze të gjatë B-52 të Forcave Ajrore të SHBA-së.

Në një deklaratë me shkrim më 13 tetor, Pentagoni tha se sistemi i baterive THAAD dhe rreth 100 personel ushtarak që do ta vendosin atë do të dërgohen në Izrael kundër kërcënimit iranian.