Presidenti i Kirgistanit jep dorëheqje nga detyra

Presidenti i Kirgistanit, Sooronbay Jeenbekov njoftoi se ka dhënë dorëheqje nga detyra, transmeton Anadolu Agency (AA).

Në një deklaratë nga Qendra për media e Presidencës, Jeenbekov tha se paqja në Kirgistan, uniteti i vendit, uniteti i njerëzve dhe paqja në shoqëri janë të rëndësishme për të mbi të gjitha.

Ai tërhoqi vëmendjen se gjendja socio-politike në kryeqytetin Bishkek ende është e tensionuar.

"Dje e miratova Këshillin e ri të Ministrave por kjo nuk uli tensionet. Vazhdojnë kërkesat për dorëheqjen time të menjëhershme. Situata aktuale është afër një konflikti dypalësh. Nga njëra anë protestuesit, nga tjetra forcat e sigurisë. Ushtarët dhe forcat e sigurisë për të mbrojtur rezidencat presidenciale janë të detyruar të përdorin armë. Nuk ka asgjë më të çmuar për mua sesa jeta e secilit prej qytetarëve të mi. Në histori nuk dua të përmendem si presidenti që ka derdhur gjakun e popullit të tij. Prandaj vendosa të dorëhiqem nga detyra", tha ai.

Jeenbekov nga kryeministri Sadyr Japarov dhe politikanët tjerë kërkoi që t'i tërheqin mbështetësit e tyre nga Bishkeku dhe t'u ofrojnë një jetë të qetë qytetarëve.

Mbështetësit e Japarovit, i cili dje u bë kryeministër dhe politikanëve të tjerë kishin kërkuar dorëheqjen e Jeenbekovit.