Emre Gürkan Abay
22 dhjetor 2017•Përditësim: 23 dhjetor 2017
MOSKË (AA) – Presidenti i Rusisë, Vladimir Putin, tha se strategjia e re për sigurinë kombëtare të SHBA-ve është sulmuese dhe agresive, raporton Anadolu Agency (AA).
“Ne do ta shqyrtojmë këtë strategji të re. Të gjitha ndryshimet në balancat e forcave në botë, përfshirë edhe Lindjen e Mesme, duhet të ndiqen nga afër”, deklaroi Putin gjatë fjalimit të tij në takimin e organizuar në Ministrinë e Mbrojtjes së Rusisë.
Ai akuzoi SHBA-të për shkeljen e Traktatit për Forcat Bërthamore me Rreze të Mesme Veprimi (INF).
Presidenti rus pretendon se raketat të cilat përdoren nga SHBA-të për testimin e sistemit të mbrojtjes nga raketat, kanë strukturë të njëjtë me raketa balistike me rreze të mesme dhe të shkurtra veprimi.
“Përdorimi i këtyre raketave nga SHBA-të tregon se SHBA përdor teknologjitë të cilat janë të ndaluara në kuadër të Traktatit të INF-së”, tha Putin.
Lidhur me strategjinë e re të sigurisë kombëtare të SHBA-ve, Putin tha se “Ne këtë dokument, në gjuhën diplomatike e vlerësojmë si sulmues, kurse në gjuhën ushtarake si agresiv dhe do ta shqyrtojmë këtë strategji të re".
Gjithashtu Putin akuzoi edhe NATO-n për rritje të shpejtë të strukturës së saj ushtarake në Evropë.
“Sigurisht se nuk duhet harruar se në periudhën e fundit po rritet në vazhdimësi prania ushtarake e SHBA-ve dhe e NATO-s në Evropë. Këto çështje do të jenë një nga prioritetet e Ministrisë së Mbrojtjes të Rusisë”, thekson Putin.
Kujtojmë se Presidenti i SHBA-ve Donald Trump kohë më parë ka publikuar një dokument prej 55 faqesh, i cili përfshin strategjinë e re të sigurisë kombëtare të këtij shteti. Në dokument sidomos është potencuar se strategjitë e Rusisë dhe Kinës janë në kundërshtim me interesat e SHBA-ve.
