Rafineria më e madhe e naftës në Rusi në rajonin veriperëndimor të Leningradit u dëmtua sot në një sulm me dron të Ukrainës gjatë natës, tha guvernatori rajonal, transmeton Anadolu.

Sistemet e mbrojtjes ajrore rrëzuan dy dronë, njërin prej tyre mbi territorin e rafinerisë së naftës Kinef, degë e kompanisë Surgutneftegaz, tha guvernatori Alexander Drozdenko në një deklaratë në Telegram.

“Mbetjet e dronit dëmtuan mbulesën e jashtme të një prej tankeve. Pasojat po eliminohen”, tha Drozdenko. “Nuk ka pasur viktima apo të lënduar”, shtoi ai.

Në një deklaratë tjetër, Ministria ruse e Mbrojtjes pretendoi se 31 dronë ukrainas u rrëzuan në gjithë rajonin e Rusisë mbrëmë përpara se të shkaktonin ndonjë dëm të konsiderueshëm.

Ukraina nuk ka komentuar ende mbi pretendimet e Rusisë, ndërsa verifikimi i pavarur mbetet sfidues për shkak të konfliktit në vazhdim.