Gati 100 protestues u arrestuan sot pas një proteste në “Trump Tower” në New York, ku demonstruesit kërkuan lirimin e aktivistit palestinez Mahmoud Khalil, transmeton Anadolu.

Të paktën 98 persona u arrestuan në hollin e ndërtesës, ndërsa protestuesit po përballen me akuza për shkelje të pronës dhe rezistim të arrestimit, raportoi ABC News, duke cituar Departamentin e Policisë së New Yorkut.

Protesta, e organizuar nga Zëri Hebre për Paqe (JVP), tërhoqi qindra aktivistë që mbushën hollin, duke brohoritur “Lironi Mahmoudin, lironi të gjithë!”, “Duam drejtësi, ju thoni si? Sillni Mahmoudin në shtëpi tani!” dhe “Luftoni nazistët, jo studentët!”.

JVP-ja transmetoi drejtpërdrejt demonstratën, e cila filloi rreth orës 11:30 të mëngjesit me kohën lokale, kur protestuesit hynë në ndërtesë në dy grupe – disa nga hyrja e përparme, të tjerët nga një derë anësore.

Shumë prej tyre kishin veshur këmisha të kuqe me sloganet “Jo në emrin tonë” dhe “Ndaloni armatimin e Izraelit”.

Khalil, zotërues i kartës së gjelbër dhe student i Universitetit Columbia, i cili ndihmoi në organizimin e protestave në kampus vitin e kaluar, u arrestua të shtunën në rezidencën e tij në pronësi të universitetit në New York në atë që avokatët e tij thanë se ishte përpjekje për dëbim e motivuar politikisht nga administrata Trump.

Sipas gazetës “The Washington Post”, gjatë fushatës vitin e kaluar për presidencën amerikane, Trump, pas dyerve të mbyllura, u zotua se do të “përzë” protestuesit e huaj propalestinezë nëse do të zgjidhej,

Khalil u arrestua nga agjentët e Emigracionit dhe Doganave (ICE) të cilët pretenduan se viza studentore i ishte hequr, edhe pse ai është banor i përhershëm ligjor dhe jo me vizë studentore. Agjentët më pas i thanë atij se karta e tij jeshile ishte revokuar.

Ai është i martuar me një shtetase amerikane e cila është tetëmuajshe shtatzënë. Gruaja e tij e dënoi arrestimin, duke thënë se ajo ende po pyet se kur Mahmoud do të ketë mundësinë ta telefonojë.