Numri i personave që kanë humbur jetën në dy tërmetet e fuqishme që ndodhën në Mianmar është rritur në 3.564, transmeton Anadolu.

Sipas agjencisë Xinhua, Këshilli i Administratës Shtetërore të Mianmarit (SAC) që është organi administrativ i qeverisë ushtarake në Mianmar, ka bërë një deklaratë lidhur me këtë çështje.

Në deklaratë thuhet se numri i personave që kanë humbur jetën nga tërmetet është rritur në 3.564 ndërsa numri i të plagosurve në 5.012.

Ekipet e kërkim-shpëtimit vazhdojnë punën e tyre për më shumë se 200 persona të raportuar të zhdukur.

Në deklaratën nga Zjarrfikësi i Mianmarit thuhet se ekipet e kërkim-shpëtimit kanë nxjerrë trupat e pajetë të 10 personave nga rrënojat e një ndërtese të shembur në Mandalay, qytetin e dytë më të madh të vendit.

Gjithashtu në deklaratë thuhet se ekipet që kanë ardhur në ndihmë nga Singapori, Malajzia dhe India kanë përfunduar punimet dhe janë kthyer në vendet e tyre.

- Tërmetet në Mianmar

Dy tërmete me magnitudë prej 7.7 dhe 6.4 ballë u shënuan më 28 mars në afërsi të rajonit Sagaing në pjesën qendrore të Mianmarit.

Tërmetet u ndjenë fuqishëm edhe në vendet fqinje Tajlandë dhe Kinë ndërsa shkaktuan shkatërrime të mëdha në vend.