Rritja e popullsisë së Brukselit ngec për herë të parë në 30 vjet

Popullsia e Rajonit të Kryeqytetit të Brukselit në Belgjikë mbeti pothuajse e pandryshuar në vitin 2025, duke i dhënë fund tri dekadave të rritjes së pandërprerë, tregojnë të dhënat e publikuara sot nga Instituti i Brukselit për Statistikat dhe Analizat (BISA), transmeton Anadolu.

Rajoni kishte 1.255.834 banorë më 1 janar 2026, vetëm 39 më shumë se një vit më parë, sipas të dhënave të zyrës belge të statistikave Statbel dhe Regjistrit Kombëtar, të cituara nga portali i lajmeve Bruzz.

BISA tha se stagnimi u shkaktua kryesisht nga rënia e ndjeshme e migrimit ndërkombëtar dhe vazhdimi i largimit të banorëve nga Brukseli drejt rajoneve të Flandrës dhe Valonisë.

Rreth 18.553 persona më shumë u larguan nga Brukseli drejt Flandrës ose Valonisë sesa erdhën në drejtim të kundërt. Migrimi ndërkombëtar mbeti faktori kryesor që mbështeti rritjen e popullsisë.

Në vitin 2025, 48.179 persona u zhvendosën në Bruksel nga jashtë vendit ndërsa 34.191 banorë u larguan nga vendi, duke rezultuar në një bilanc pozitiv të migrimit ndërkombëtar prej 13.988 personash.

BISA tha se bilanci i migrimit ndërkombëtar ra me 27,9 për qind krahasuar me një vit më parë. Numri i personave që mbërritën nga jashtë vendit ra me më shumë se 6.000 krahasuar me vitin 2024 dhe me gati 14 mijë krahasuar me vitin 2022.

BISA raportoi rënien e përqindjes së banorëve të Brukselit me shtetësi të huaj për herë të parë në dy dekada. Më 1 janar 2026, 461.155 banorë të Rajonit të Kryeqytetit të Brukselit nuk kishin shtetësi belge, rreth 6.000 më pak se një vit më parë.

Rënia iu atribuua kryesisht rritjes së kostos për marrjen e shtetësisë belge. Tarifa u rrit nga 150 euro në 1.000 euro në verën e vitit 2025.