Rrëzohet një avion në Brazil, humbin jetën 62 persona

Një aeroplan me 58 pasagjerë dhe katër anëtarë të ekuipazhit u rrëzua në një zonë banimi në Sao Paulo të Brazilit, ku të gjithë personat në aeroplan humbën jetën, raporton Anadolu.

Sipas autoriteteve lokale, aeroplani i identifikuar si Voepass, fluturimi 2283, u rrëzua pranë një shtëpie në Vinhedo, në veriperëndim të kryeqytetit. Autoritetet theksuan se askush në tokë nuk u lëndua në aksident.

Avion ii tipit ATR-72-500 me kapacitet 68 persona, u rrëzua në lagjen Capela rreth orës 13:28 sipas kohës lokale.

Ai ishte nisur nga qyteti Cascavel, Parana, dhe ishte rrugës për në Aeroportin Ndërkombëtar Guarulhos në Sao Paulo.

Raportet nga platforma e gjurmimit të avionit Flightradar treguan se fluturimi kishte humbur afërsisht 4.000 metra lartësi në një hark kohor prej rreth një minute.

Spitalet në Vinhedo dhe në qytetin fqinj të Valinhos u mobilizuan për të trajtuar të lënduarit e mundshëm, ndërsa në vendngjarje dolën zjarrëfikës, policia ushtarake dhe njësi të mbrojtjes civile.

Presidenti i Brazilit, Luis Inacio Lula da Silva, u shpreh se ky është “një lajm shumë i trishtueshëm”.

Kompania ajrore braziliane Voepass Linhas Aereas lëshoi ​​një deklaratë në mbështetje për autoritetet që u aktivizuan menjëherë, duke shtuar se shkaku i incidentit ishte i panjohur.