Rusia dhe Ukraina kanë përsëritur akuzat e tyre për shkeljen e një marrëveshjeje të ndërmjetësuar nga SHBA-ja për të ndalur sulmet kundër infrastrukturës energjetike të njëra-tjetrës pas bisedimeve në Arabinë Saudite, transmeton Anadolu.

Muajin e kaluar, SHBA-ja ndërmjetësoi dy marrëveshje midis Rusisë dhe Ukrainës, një për të "siguruar lundrimin e sigurt" në Detin e Zi dhe një tjetër për një ndalim 30-ditor të sulmeve që shënjestrojnë infrastrukturën energjetike, pas bisedimeve në Arabinë Saudite.

Pavarësisht marrëveshjeve, të dyja palët shpesh kanë akuzuar njëra-tjetrën për shkelje të pauzës së sulmeve të lidhura me infrastrukturën e energjisë.

"Një raund tjetër sulmesh të qëllimshme dhe dëmtime në objektet energjetike, një dron FPV goditi një nënstacion në rajonin Sumy dhe në Nikopol të rajonit Dnipro një linjë elektrike u dëmtua nga zjarri i artilerisë", njoftoi në rrjetet sociale presidenti ukrainas, Volodymyr Zelenskyy.

Duke njoftuar se rreth 4 mijë konsumatorë në të dy rajonet mbetën pa energji elektrike për shkak të sulmeve, Zelenskyy përsëriti nevojën për "presion të ri dhe të qartë ndaj Rusisë për ta çuar këtë luftë drejt përfundimit".

"Kjo natyrë sistematike dhe konstante e sulmeve ruse tregon qartë se Moska përçmon përpjekjet diplomatike të partnerëve. Putini nuk dëshiron as të sigurojë një armëpushim të pjesshëm", tha Zelenskyy. Ai bëri thirrje për veprime "sa më shpejt të jetë e mundur", duke theksuar se "nuk duhet të presim deri më 11 prill, kur do të bëhet një muaj që kur Rusia i tha jo propozimit amerikan për një armëpushim".

"Ne jemi të gatshëm të punojmë me të gjithë partnerët tanë në SHBA, Evropë dhe në mbarë botën në mënyrën më konstruktive për të arritur këtë rezultat shumë të nevojshëm, një paqe dinjitoze dhe të qëndrueshme", shtoi ai.

Forcat Ajrore të Ukrainës pretenduan se mbrojtja e saj ajrore rrëzoi 41 nga 74 dronët e lëshuar nga Rusia gjatë sulmit natën e kaluar. Moska nuk i komentoi menjëherë akuzat, edhe pse Ministria e Mbrojtjes e Rusisë më vonë akuzoi Ukrainën për kryerjen e dy sulmeve në infrastrukturën e saj energjetike në rajonin kufitar të Kurskut gjatë ditës së kaluar.

Ministria ruse tha se sulmi i Kievit rezultoi në ndërprerje të energjisë për mbi 1.500 konsumatorë në rrethin qendror Kursky të rajonit. Në një njoftim të mëparshëm, ministria pretendoi se mbrojtja ajrore e vendit gjatë natës ka kapur 93 dronë ukrainasë, nga të cilët 87 u rrëzuan mbi rajonin e Kurskut.