Rusia ka kërkuar nga presidenti amerikan, Donald Trump dhe administratës së tij që të adresojë dhe korrigjojë gabimet e bëra nga paraardhësit e tyre, presidenti Joe Biden dhe ekipi i tij, në lidhje me situatën në Ukrainë, raporton Anadolu.

Zëdhënësja e Ministrisë së Punëve të Jashtme të Rusisë, Maria Zakharova, foli në një konferencë për media në Moskë, ku theksoi se këto gabime janë bërë në një kapacitet zyrtar dhe kombëtar.

“Biden i bëri ata si president i shtetit, administrata e tij i bëri ata si qeveri në pushtet dhe zyrtarët amerikanë i bënë ata si përfaqësues të SHBA-së. Dhe, çfarë bëhet me gabimet e bëra në emër të vendit apo në rrjedhën e qeverisjes? Ato korrigjohen”, tha Zakharova.

Zakharova theksoi se meqenëse administrata aktuale ka pranuar dhe argumentuar në mënyrë të përsëritur se situata në Ukrainë buron nga gabimet e administratës së mëparshme, duket logjike që ato gabime tani të korrigjohen.

Rusia filloi "operacionin special ushtarak" në Ukrainë në shkurt të vitit 2022. Administrata amerikane e udhëhequr nga Biden dhe aleatët e saj ofruan armë dhe ndihmë për Kievin dhe vendosën sanksione gjithëpërfshirëse ekonomike dhe financiare ndaj Moskës.

Trump është zotuar se do t'i japë fund konfliktit shpejt. Dje, ai i kërkoi Rusisë të "zgjidhet tani" ose të përballet me më shumë "taksa, tarifa dhe sanksione".

Në përgjigje të pyetjes nga Anadolu nëse ishte planifikuar një takim mes ministrave të jashtëm të dy vendeve, zakonisht një pararendës i bisedimeve presidenciale, Zakharova tha: "Jo, deri më tani, një opsion i tillë nuk është kërkuar nga SHBA-ja".

E pyetur për vlerësimin e Rusisë për vendimin e Trumpit për të hequr sanksionet ndaj kolonëve izraelitë në Bregun Perëndimor, Zakharova tha se Moska është në pritje të strategjisë më të gjerë të administratës së re për Lindjen e Mesme.

"Para së gjithash, vendimet nga palët e interesuara rajonale, banorët e njerëzit, duhet të vlerësohen," tha ajo.

"Megjithatë, ky është përfundimisht vendimi i presidentit të SHBA-së. Ndoshta ne do ta rishikojmë këtë temë pasi strategjia e përgjithshme e administratës të bëhet e qartë, e mbështetur nga hapa konkrete dhe një vizion gjithëpërfshirës”, shtoi ajo.

Ajo theksoi se tani Moska vëzhgon ato që duken se janë "vendime sporadike dhe të pavarura".

"Unë besoj se nevojitet më shumë kohë për të kuptuar shtrirjen e plotë të strategjisë së SHBA-së në Lindjen e Mesme. Janë bërë shumë deklarata, por veprime të prekshme sapo kanë filluar. Le të presim që të shfaqet një pamje më kohezive," tha ajo.