Yusuf Özcan
10 Qershor 2018•Përditësim: 10 Qershor 2018
PARIS (AA) - Presidenti francez, Emmanuel Macron, njoftoi se Samiti i ardhshëm G7 vitin tjetër do të mbahet në Biarritz të Francës, transmeton Anadolu Agency (AA).
Macron mbajti një konferencë për shtyp pas Samitit të G7 të zhvilluar në Charlevoix, Quebec City të Kanadasë.
Duke vënë në dukje se Samiti i G7 nuk ka eliminuar të gjitha mosmarrëveshjet, por se në një situatë me tension të lartë ka ofruar një unitet veçanërisht mbi politikën e jashtme dhe tregtinë, Macron tha se 6 vende përveç SHBA-ve ranë dakord në çështjen e klimës.
Ai tha se duhet të zbatohen rregullat ndërkombëtare për tregtinë dhe vuri në dukje se Organizata Botërore e Tregtisë (OBT) duhet të reformohet.
Macron theksoi se po ashtu do të regjistrohen zhvillime më të mira në tregti nëse OBT do të jetë më efektive, dhe ka shtuar më tej se dje kishte biseduar me Presidentin e SHBA-ve, Donald Trump, ku në këtë bisedë ka qenë në rend edhe çështja e tregtisë.
Ndër të tjera Macron ka bërë të ditur se në këtë samit kanë diskutuar edhe çështjen e Sirisë ku dhe kanë nënshkruar një deklaratë të përbashkët për hapat që do të hidhen në parandalimin e përdorimit të armëve kimike.
Në fjalën e tij Macron ka njoftuar se që nga 1 janar 2019 do të marrin presidencën e radhës dhe se Samiti i ardhshëm G7 vitin tjetër do të mbahet në Biarritz të Francës.
Ndërsa në lidhje me pjesëmarrjen apo jo të Rusisë vitin e ardhshëm kur Franca do të ketë presidencën e radhës, presidenti Macron tha se "Këtë e bëjmë, por Rusia duhet të zbatojë marrëveshjen e Minskut. Rusia në momentin që zbaton këtë marrëveshje ajo të nesërmen përfshihet në grup".
