SHBA-ja teston inteligjencën artificiale si asistent piloti në avionët ushtarakë

Startup me bazë në Kaliforni, Beacon AI, njoftoi sot se asistenti i pilotit me Inteligjencë Artificiale (IA) përfundoi pesë fluturime në bordin e tre avionëve opercionalë të furnizimit me karburant KC-46A Pegasus të Forcave Ajrore të SHBA-së, transmeton Anadolu.

Sistemi portativ i njohur si Murdock, regjistroi 20 orë fluturimi nëpër tre fusha ajrore në tre javë në gusht dhe shtator, duke filluar gjatë stërvitjeve ushtarake Emerald Flag në bazën e Forcave Ajrore Eglin në Florida, thuhet në një deklaratë.

Testet u kryen sipas një kontrate me Komandën e Lëvizshmërisë Ajrore të Forcave Ajrore përmes programit të Rritjes së Financimit Taktik AFWERX, pas një marrëveshjeje të mëparshme me Komandën e Operacioneve Speciale të SHBA-së.

Murdock mbledh të dhëna nga avionika e avionëve për t'u ofruar ekuipazheve të fluturimit ndihmë në kohë reale dhe informacion operacional pa modifikuar sistemet kritike të fluturimit ose pa marrë kontrollin e avionit. Beacon AI i përshkroi testet si një hap të rëndësishëm drejt vendosjes së asistencës së fuqizuar nga IA në bordin e avionëve ushtarakë operacionalë në vend të platformave të dedikuara të testimit.

"Mënyra e duhur për të sjellë një sistem si ky në kabinë është ta bësh këtë në mënyrë progresive: ta vendosësh atë në duart e ekuipazheve reale në misione reale, të ndërtosh mbi atë që tashmë bën mirë dhe të zgjerosh aftësitë e tij pasi përvoja dhe provat operacionale e mbështesin atë", tha bashkëthemeluesi dhe drejtori ekzekutiv, Matt Cox.

Kompania tha se sistemi është projektuar për të mbështetur pilotët duke lënë të gjitha vendimet operacionale dhe autoritetin me ekuipazhet e fluturimit. Beacon AI planifikon të zgjerojë aftësitë e Murdock-ut në ciklin jetësor të fluturimit, nga planifikimi dhe operacionet e fluturimit tek rishikimet pas fluturimit, duke përdorur të dhënat dhe reagimet e mbledhura gjatë testimit operacional.