Shtëpia e Bardhë ka deklaruar se SHBA-ja nuk mbështet operacionet ushtarake izraelite në rajonin jugor të Gazës nëse nuk ka një plan për të mbrojtur civilët, transmeton Anadolu.

"Derisa ata tani konsiderojnë lëvizjen e operacioneve të tyre në jug, ne kemi thënë se nuk i mbështesim ato lloj operacionesh në mungesë të një plani koheziv nga izraelitët për të faktorizuar se si ata do të jenë në gjendje të mbrojnë atë që tani matematikisht është, një rritje në mënyrë dramatike e popullsisë civile në jug", tha John Kirby, zëdhënës i Këshillit të Sigurisë Kombëtare.

Kirby theksoi domosdoshmërinë për "një plan të artikuluar qartë se si ata synojnë të mbrojnë jetën e qindra mijëra njerëzve që janë të zhvendosur në zonë me kërkesë të izraelitëve".

"Ekziston një detyrim që ata ta përfshijnë atë në planifikimin e tyre", tha ai.

Izraeli lëshoi fletëpalosje në jug të Gazës javën e kaluar, duke u kërkuar civilëve të evakuohen. Fletëpalosjet tregonin zgjerimin e mundshëm të operacionit tokësor të Izraelit kundër Hamasit në pjesën jugore të enklavës.

Izraeli ka nisur sulme të pamëshirshme ajrore dhe tokësore në Rripin e Gazës pas një sulmi ndërkufitar nga Hamasi më 7 tetor.

Së fundmi, autoritetet në Gaza njoftuan se numri i palestinezëve të vrarë nga sulmet izraelite në enklavën e rrethuar që nga 7 tetori është rritur në 14.128, përfshirë 5.840 fëmijë dhe 3.920 gra.

Mijëra ndërtesa, përfshirë spitale, xhami dhe kisha janë dëmtuar ose shkatërruar në ofensivën izraelite.

Bllokada izraelite gjithashtu ka ndërprerë Gazën nga furnizimet me karburant, energji elektrike dhe ujë, si dhe ka reduktuar dërgesat e ndihmave.

Ndërkohë, numri zyrtar i vdekjeve izraelite është rreth 1.200.