Spekulimet janë rritur pas shpërthimeve vdekjeprurëse të pajisjeve "pager" të përdorur nga anëtarët e grupit Hezbollah në Liban për mënyrën se si u modifikuan këto pajisje të komunikimit si dhe për origjinën e tyre, raporton Anadolu.

Qeveria libaneze ka akuzuar Izraelin se qëndron pas incidentit, i cili sipas autoriteteve të shëndetësisë, la të paktën nëntë të vdekur, përfshirë një fëmijë si dhe rreth 2.800 të tjerë të plagosur, me 200 prej tyre në gjendje kritike.

Pas sulmeve janë ngritur pikëpyetje se si shpërthyen pajisjet. Në mediat sociale, tre modele të përdorura nga anëtarët e Hezbollahut kanë tërhequr vëmendje të konsiderueshme.

Një nga pajisjet është e lidhur me kompaninë "Motorola", selia e së cilës është e vendosur në SHBA, e cila ka prodhuar telefona dhe pajisje komunikimi që nga fillimi i viteve 1900. Pavarësisht thashethemeve, nuk ka pasur asnjë imazh të konfirmuar të qarkulluar të "pagerëve" të markës "Motorola" që shpërthyen ose pësuan dëmtime në sulm.

Postimet në median sociale gjithashtu iu referuan pajisjeve nga linja Teletrim e kompanisë "Motorola", megjithëse këto u treguan se ishin njësi të padëmtuara. Një pajisje tjetër që tërhoqi vëmendjen është "Gold Apollo Rugged Pager AR924", i prodhuar nga "Apollo Gold" me bazë në Tajvan dhe i shitur nga "Apollo Systems HK" i Hong Kongut.

Imazhet e shpërndara në internet treguan pajisje të dëmtuara të markës "Apollo" me informacione të dukshme të modelit. "Apollo Systems HK", përmes faqes së saj zyrtare të internetit, tha se ofron sisteme komunikimi dhe sinjalizues për industri të ndryshme në mbarë botën, përfshirë objektet digjitale të shëndetit dhe kujdesit.

Kompania thekson rolin e saj në ofrimin e zgjidhjeve të besueshme të komunikimit dhe të bazuara në rrjet në mbarë botën.

Në një masë të konsiderueshme, kompanitë në fjalë kishin ndërprerë shitjet e këtyre modeleve shumë kohë më parë për shkak të rritjes së telefonave celularë dhe internetit, por shitjet e dorës së dytë të këtyre pajisjeve duket se do të vazhdojnë.

Shpërthime dhe viktima

Shpërthimet e koordinuara të pajisjeve "pager" ndodhën nëpër vende të shumta në Liban, me anëtarët e Hezbollahut që ishin shënjestrat kryesore. Ministria e Shëndetësisë e Libanit raportoi se shpërthimet rezultuan në nëntë viktima dhe rreth 2.800 të plagosur.

Izraeli nuk ka lëshuar ende një deklaratë për incidentin, megjithëse tensionet përgjatë kufirit Izrael-Liban janë intensifikuar që nga 8 tetori i vitit 2023, mes përleshjeve të vazhdueshme.